КулЛиб - Классная библиотека! Скачать книги бесплатно 

Житие Прокопия Устюжского [Юрий Иовлев] (fb2) читать онлайн


 [Настройки текста]  [Cбросить фильтры]
  [Оглавление]

Житие 1660–е гг.

1660–е гг.

РГБ, Отдел рукописей, ф. 310, ед. 362, лл. 1 — 60 об. Подлинник. 8`. Полуустав. Сохранность хорошая.

Разночтения даны по: РГБ, Отдел рукописей, ф. 205, ед. 304. Житие Прокопия Устюжского. Конец XVI в. 4`. 125 л. Полуустав. (В сносках — ОИДР, N 304).

Л.1. НАДПИСАНИЕ ОГЛАВЛЕНИЮ КНИГИ СЕЯ

Предисловие житию святаго и праведнаго Прокопия 1

[О] зачале жития блаженнаго Прокопия 2

[Е]го ж о приходе на Устюг 3

[О] явлении Божия благодати блаженному Прокопию

и о проповеди гнева Божия над градом Устюгом 4

О зимном мразе и о терпении святаго 5

О втором пророчестве святаго Прокопия о отро–ковице Марии, матери святаго Стефана Великопермскаго 6

[О] преставлении и о погребении блаженнаго

Прокопия, лист 7

[О] поставлении часовни над телом его, лист 8

[О] поставлении первыя новыя церкви над телом

его, лист

Л.5. МЕСЯЦА ИУЛИА В 4 ДЕНЬ ЖИТИЕ И ПОДВИЗИ СВЯТАГО ПРАВЕДНАГО ПРОКОПИЯ, ИЖЕ ХРИСТА РАДИ УСТЮЖСКОГО ЧУДОТВОРЦА.

Искони убо Божественное писание глаголет о блаженных и юродивых и приснопамятных святых мужех, понеже бо они святии богоугодно и праведно житие во плоти сущей на земли пожиша и непорочно и что подвиг скончавше по Христе, и сего ради ангелом

Л.5 об. уподоблении быша, понеже убо пребыша в посте и в молитве и подвизе духовнем и просиявше в житии сем яко звезды небесныя и победу велию на враги показаша, красоту же мира сего суетнаго далече от себе отринуша и славу света сего прелестнаго ни во что же вмениша, но всегда пречистыми душами своими желающе во оный некончаемый век будущыя жизни и наслаждения с Господом Богом и со святыми его ангелы, с пророки же и апостолы и мученики, яко же уготовано бысть им

Л.6. от сложения мира. И сего ради, братие, добро есть нам и полезно тех святых, достоблаженных Христа ради юродивых мужей, чистое их житие и подвизи и от них бывающая преславная чюдеса слышати и преписовати. Того бо ради бывает нам от Господа Бога полза велика и мзда немала, послушателем же и сказителем сведущим сия известно, наипаче же всаждает и вкореневает в сердца наша, еже боятися его и на добрая дела направляет и ревновати сих святых житию подобает. Ащели же не написана будут благодея

Л.6 об. ния их, памяти ради достойныя, то убо ис памяти нашея изыдет и забвению и неразумию подлежит в нынешнем же и в последнем роде нашем. Кто возможет от человек таковых святых достоблаженных, иже Христа ради юродивых мужей по достоянию похвалити или по существу изглаголати, их же житию и терпению и сами тии ангели Божии удивишася и похвалиша, понеже убо тех святых мужей имена и добродетели их написаны суть на небесех. Яко же бо тии святии в житии своем силою Пресвятаго

Л.7. Духа взяша крест Христов на рамех своих и последоваша ему. И того ради отверзе им Господь двери райския породы, да внидут в радость его и наслядятся вечныя жизни. О сих святых пишет в поучении своем Великий Василий весарии каппадокийския, сице:"Братия, будите ревнители на земли право жищим человеком. Силу же и имена и деяния и подвиги их слышите разумно и напишите на сердцах своих. Но весма же аз, грубый, не достигох в меру тех святых и блаженных жития и приити в прясло их не возмогох.

Л.7 об. Но обаче убо надеяхся на Бога и уповая на помощь его, яко же рече самая истинна Христос:"Не можете убо творити без мене творити ничесо же". И паки и сем Иоан Златоуст в поучении своем, в слове шесдесят пятом глаголет:"Еже бо восхотети токмо и взыскати и дело некое начати — наше человеческо есть, а еже совершити се или оно — на божественней власти и силе и хотении есть. Подобает же нам, и начинающим и ищущым некое дело сотворити, от Бога искати и призывати споспешение и хотение и помощь".

Л.8. Обаче же и еже хотети нам и делати благое от Бога есть, Бог убо есть действуяй в нас и еже хотети и действовати. О сем же и Апостол глаголет:"Той есть усердие даяй нам, еже хотети благое и делание его на конец приводит и приносит Господь. Мы же на та же дела совершаема зрим, ко онем и хотение наше имамы. И аще начнем дело благое, аще последует и конец, разслабляется и хотение наше, и разленяемся на совершение; аще ли имамы Бога споспешающа и усердие наше распаляюща, прилагается нам и еже хотети. И тако

Л.8 об. можем благо совершати, вся убо наша совершаем на Бога, понеже кроме его исправити кто ничтоже может, но обаче убо надеяхся и аз, грубый, на его праведную волю и на угодника его праведнаго и блаженнаго Прокопия, иже Христа ради юродиваго, и на молитвы его. Дерзнухом списати житие его и духовный его о Бозе подвиг и отчасти чюдес его мала некая воспомянух в память предидущему роду, да незабвенна будут и память его святая, и преславная и дивная его чюдотворения и добродеяния.

Л.9. Дерзнух же написати сия малая словеса святаго праведнаго Прокопия не на скрижале сердечных, но в чювственных хартиях, и вспомянути послушателем на ползу душам их. Но приидите, братие, в церковь сего праведнаго и блаженнаго Прокопия Устюжскаго, новаго чюдотворца, и рицем вси купно, сице глаголя:"Превеликое чюдотворение святаго праведнаго Прокопия, светилника пресветлаго, еже бо из детска возраста имея в неверии во странах своих добродетелное свое житие, и еже убо в вере христианстей по градом Христа ради в странствии

Л.9 об. и во многом терпении пребывая, по земли же и по рекам чюдотворение его бысть, даже и до самого преставления его. А иде же ныне почивает многострадальное и терпеливое тело его, и на том месте по преставлении его наипаче бывает чюдесем его велия похвала и неоскудна благодать истекает всегда от святаго гроба его даже до ныне приходящим многим человеком с верою благою, надежду и любовь и упование имуще ко благому и милостивому Господу Богу нашему и ко пречистей его Богоматери и ко блаженному молебни

Л.10. ку праведному Прокопию. И сия убо нам подобает собрати во едино и написати ползы ради душ человеческих, ино убо слышах от человек, ино же и сами видехом очима нашима таковое Божие чюдотворение, яко молитвами его содеваются велия чюдеса от целбоноснаго гроба его. Тем же, возлюбленная моя братия, помолимся вси прилежно Господови и просим от него превеликия и пребогатыя милости на отверзение уст своих к похвале блаженнаго Прокопия. Слово же благаго изглаголати, яко же иногда древле пророк Исаиа глагола:

Л.10 об."Господь даде ми язык ведети ко глаголанию, внегда подобает ми истинная словеса глаголати". Тако ж де и Давид пророк глаголет:"Господь даст глалгол благовествующим силу многу, и яко всяко убо даяние благаго и всяк дар совершен свыше есть ходяй от Отца светов, еже есть единородным его сыном, понеже всем вся тем быша и без него же ничто же бысть еже бысть". И сам бо Господь глагола ко учеником своим:"Вы бо без мене ничтоже можете сотворити. Простие бо и дастся вам". Тому же и мы, братия моя возлюбленная, ныне поревнуем

Л.11. и спросим от Господа милости, и помолимся ему, и припадем, и восплачемся Господови, и с Давидом возопием:"Господи, устне мои отверзеши, и уста моя возвестят хвалу твою. И яко очисти, Господи, душу мою от грехов моих и исцели страсти плоти моея и сердце чисто созижди во мне, Боже", яко да возмогу по силе моей похвалити добраго сего наставника и учителя всемирнаго, праведнаго и блаженнаго Прокопия, иже Христа ради юродиваго, новаго чюдотворца, произволением страстотерпца Христова, и пречистое житие его подробну исписати и преславная его

Л.11 об. чюдодеяния. И по том на Господа Бога упова душа моя и на праведнаго сего и молитва его споспешествующими да глголем зачало словеси жития его.

О ЗАЧАЛЕ ЖИТИЯ БЛАЖЕННАГО ПРАВЕДНАГО ПРОКОПИЯ.

Сей убо блаженный и присно поминаемый Прокопий, яко же о нем исперва поведают некотории от человек, жителие Великаго Нова града, быти ему от западных стран, от латинска языка, от немецкий земли. Рождение же и воспитание его бысть в великом богатстве, родитель же и ужик и веры никто же весть,

Л.12. но токмо единому Богу, сведущу сия. И пришедшу ему в совершенный возраст. И по том времени наполни корабль от имении своих во отечествии своем и отиде от дому и от земли своея. И не по мнозе же времени Божиим произволением прииде кораблем окременным многим богатством зело в Великий Нов град с прочею своею дружиною с латинники. И яко же они имеяху обычай ту по вся лета приходити купецким обычаем, ту же и сей святый Прокопий. И виде в Великом Нове граде истинную православную веру християнскую, понеже убо она сияше

Л.12 об. в мире якоже солнце, премногое церковное украшение и поклоняние святым иконам, и звон велий, и слышит святое пение и чтение святых книг; и множество монастырей около Нова града сограждено, и мнишеским чином велми украшено. И по том его видении и помышлении вниде в него Божия благодать. И оттоле он уязвися всею душею и сердцем своим на истинную веру Христову, и начат по ней велми душею своею горети и радети, всеми составы тела своего день и нощь, како бы ему прийти на совершенный о Бозе подвиг. Потом же возлюби место в Нове

Л.13. граде и веру православную, отеческую же веру возненевиде, в ней же воспитан бысть от родитель своих. По сем же отиде от дружины своея, утаявся и сохранися от них. Та же начат ходити по граду и по монастырем и искати себе нача учителя мудра и разумна и наставника непрелестна к вере Христове. Приидеже тамо от живущих во един от монастырей, именуемы На Хутыню от Великого Нова града разстоянием седмь поприщ. Тогда же в нем игуменство имея преподобны отец наш Варлаам. И вниде он в той монастырь, и при

Л.13 об. паде к ногама преподобнаго Варлаама, и начат его молити со многими слезами, дабы его научил Господню Евангелскому словеси и заповедем его и православной непорочней вере Христове. И поведа себе пришелца, от северныя страны суща, от языка латинска, и о многом своем богатстве, и о помысле сердца своего ко христианской вере. Преподобный же Варлаам, видев его умиленна и слышав от него таковыя глаголы, и о сем начат помышляти в сердцы своем и во уме своем, яко не истинну ему глаголет Прокопий таковыя словеса. Он же,

Л.14. моляшеся ему и припадая к преподобному Варлааму со смогим плачем и рыданием зелным, дабы его преподобный научил и наказал заповедем Господним и направил бы его ко спасенному евангелскому пути. Преподобный же Варлаам, видев его благоразумныма очима своима неуклонный его разум и непреложное сердце, на таковое Божие хотение, и разумев духом, яко хощет в нем сосуд избранный быти святому духу. Прокопий же неотступно пребывая у преподобного Варлаама. По сем же преподобный Варлаам отверзе уста своя, начат к нему глаголати Господне

Л.14 об. Евангелское глаголющее слово:"Иже аще кто хощет по Мне ити да оверзется себе, и возмет крест свой, и на кийждо день последует Ми. Иже бо аще хощет душю свою спасти, погубит ю напастми и бедами и терпением многим, а иже бо аще душу свою смирит Мене ради и Евангелия, той спасет ю. И кая бо есть полза человеку, аще и всего мира удержит богатство себе, а душу свою отщетит. Или что дастся человеку измены на душу его. Иже бо аще кто постыдится Мене и Моих словес, сегоже и Сын Человеческий постыдится. И егда бо приидет Господь во славе свое

Л.15. и вси святии Ангели с ним. И тогда речет им: приидите благословеннии Отца Моего, наследуйте уготованное вам Царство от сложения мира, сутже нецыи зде от предстоящих, иже тии не имут вкусити смерти, дондеже узрят Царство Божие, пришедшее в силе". Тогдаже блаженный Прокопий слышав сия евангельская словеса от преподобнаго Варлаама, яко изо уст Божиих и положи сия на сердцы своем радостно и восприят во уме своем твердо. И потом взем имение свое у дружины своея и отиде от них и нача в монастыре, у преподобнаго Варлаама неотступно пребывати

Л.15 об. и внимати Божию словеси и наслаждатися закону Христову день и нощь. Преодобный же Варлаам всегда учаше его спасенному пути и насыщая душу его яко медвенным сотом Божественным учением и святыми книгами. Ту же он вкупе и долу влекущее латинское мудрование оставляет и восприемлет пощение и велико о Бозе терпение повелением преподобнаго отца Варлаама учителя и наказателя своего. И потом прият святое крещение и раздая все имение свое нищим и неимущим Христа ради и в монастырь преподобнаго Варлаама на устроение церковное боголе

Л.16. пнаго Преображения Господа нашего Исуса Христа. А сам оттоле приемлет юродственное Христа ради житие и в буйство преложися по Апостолу, глаголющему:"Братия, буяя мира сего жития избра Бог. Да ся посрамит крепкая и премудрая мира сего держава и покоренныя человеки на се избра Бог и несущая, да сущая человеки упразднит. И тако убо землю свою и отечество остави и ни во что же вмени его". Пребысть же блаженный Прокопий в Великом Нове граде, во обители боголепнаго Преображения иже на Хутыне у преподобнаго отца нашего Варлаама, и тамо от него научен

Л.16 об. бысть истинному Божию спасителному слову, и всегда с ним беседоваше о спасении души своея. И потом начаша его в Нове граде мнози человецы о житии его и о терпении блажити, яко сей человек велик есть пред Богом; прииде бо он от северныя страны, от немецкия земли кораблем со многим своим имением и здесь убо все свое имение раздая нищим, сиротам и в монастырь Господа ради, сам же во юродство претворися и облечеся в раздранныя и непотребныя ризы и во блаженство преложися Христа ради. Блаженный же Прокопий всегда слышит сия словеса от

Л.17. человек, глаголющих к себе и похваляема велми. Абие приходит блаженный ко преподобному Варлааму и поведает вся бывшая ему от человек похвальная словеса и по сем глагола ко преподобному:"Аз убо сего, отче, не требую ни мало и не хощу тленныя сея славы от человек видети и слышати, но хощу убо желаемыя и вечныя жизни наслаждатися и твоим великим учением и наказанием. И хощу убо аз, отче, отсюду уклонитися и ити в путнее шествие к восточным странам, идеже Господь повелит ми быти". Преподобный же Варлаам слыши таковыя глаголы от блаженнаго Прокопия и нача глаголати

Л.17 об. ему:"Чадо Прокопие, подобает ти из монастыря неисходну быти в мир, дондеже молва человеча престанет о тебе. Но пребуди зде хотя годишное время един в затворе". И глагола ему блаженный Прокопий:"Аз убо, отче святый, не требую сего и не хощу зде пребывати. Но сотвори о мне грешном молитву ко Господу Богу и благослови мя на путнее шествие". Преподобный же Варлаам слышав таковыя глаголы от блаженного Прокопия и видев его неподвижна и не преклонна сердцем на таковы подвиг. И востав преподобный Варлаам и сотвори молитву о нем и благословив его итти в путнее

Л.18. шествие к восточным странам, аможе повелит ему Дух святый быти, и много поучив его на спасенный путь и отпустив на взскание места подобна, идеже ему Господь повелит быти ко упокоению тела своего. Блаженный же Прокопий по благословению преподобнаго отца Варлаама пойди из Великого Нова града в путнее свое шествие к восточным странам. И прохождаше блаженный многия грады и веси и страны, и не проходимыя лесы и дрязги, и блата мокрыя и непроходимыя. И все то с радостию святый терпяше Христа ради, желаше взыскати

Л.18 об. древняго погибшаго Отечества. В проходящих же градах и во окрестных странах прият блаженный Прокопий многу досаду и укорение и биение и пихание от безумных человек. Святый же яко юрод вменяшеся им или яко безумен и ничто же им о сем ино глагола, но токмо в себе рече:"Господи, помилуй"и моляшеся за них:"Господи, не поставь им в грех сего, не ведят бо, что творят", и многое и великое себе терпение показуя, от зимнаго мраза померзая и в летнее время от солнечнаго зноя изгараше, в день убо яко юрод хождаше, в нощи же без сна пре

Л.19. бываше и моляшеся непрестанно Господу Богу и плакашеся грехов своих. И глаголаше в себе, утешаяй душу свою:"О Прокопие, подобает ти многими скорбми внити в Царство Небесное, и яко убо нужницы восхищают е". И сими благими словесы утешая себе блаженный Прокопий, и тако прехождаше от града во град и от страны во страну, и прииде на место подобно, иже уготовано ему бысть.

О ПРИХОДЕ НА УСТЮГ СВЯТАГО ПРЕПОДОБНАГО И БЛАЖЕННАГО ПРОКОПИЯ, ИЖЕ ХРИСТА РАДИ ЮРОДИВАГО, УСТЮЖСКАГО ЧЮДОТВОРЦА.

Л.19 об. Дойдеже блаженный Прокопий великого и славнаго града Устюга и вниде в онь и почи от путняго шествия своего в верхнем конце в храмине ветхо. Посемже востав, пойде по граду и виде во граде церковное украшение, и произволи ту блаженный Прокопий жителствовати. Тогдаже вси градстии человецы видевше его и мняху его юродива и несмысленна суща умом, многа же ударения и укорения и досаждения приимаше и раны воздаяху ему. Блаженный же Прокопий яко в чюжем телеси вся та досаждения со благодарением

Л.20. приимаше и терпяше от них, неразумных человек, взирая и уповая на предлежащии подвиг, на началника веры и совершителя Исуса, и никако же досаждающим человеком не хотяше зла никоего же сотворити, но паче о них моляшеся во уме своем, глаголя:"Владыко Царю Небесный, не постави им греха сего, не ведят бо, что творят сия". И никто же бо от человек ведаше добродетелнаго его жития и приближения его ко Господу Богу. И яко же он молитву всегда творяше Господови, тогда невидим бываше от человек, но Божиею помощию и благобатию покрываем бываше.

Л.20 об. Таково убо бысть житие блаженнаго Прокопия. Славу же мира сего суетнаго и мимоходящаго ни во что же вменив, в день бо от человек оскорбляем и убиваем и утомляем бываше многим оскорблением, а в нощи нимала покоя себе пиимаше, но по граду и по всем Божиим церквам хождаше и моляшеся Господави со многими слезами и в коленном поклонянии пребывая, прося у Бога полезных граду и людем. Заутра же, паки во весь день, блаженный Прокопий исходаше на улицы градныя и в похабстве пребывая.

Л.21. Егда же хотяше святый покой обрести от многаго труда своего или почити мало, тогда на улицых на гноищи или на сметьище или в ветхо и непокровенно храмене пометаше себе единым токмо нагим телом своим лежаше. Зиминий же мраз и снег и летний солнечный вар и зной и дождь, и все то блаженный Прокопий с радостию терпяше и со благодарением Бога ради; и тако пребывая во вся дни живота своего. И яко же убо блаженный Прокопий Бога возлюби всею душею своею и телом, тако же и Бог его возлюби и прослави в сем мире

Л.21 об. от юностнаго возраста его не токмо бо в сем веце, но и в будущем в бесконечном Царствии сторицею подает ему превеликую свою благодать. И приемлет от него пророческий дар блаженный Прокопий, яко и чюдеса велия творити при животе своем. По сем же блаженный Прокопий изволи жительствовати соборныя и апостолския церкви Пресвятыя Богородицы честнаго и славнаго Ея Успения в паперти церковней. Соборная же церковь тогда древянная бе и превысока зело. Ту же блаженный Прокопий пребываше неотступно от церкви Пресвятыя Богородицы в зиме же

Л.22. и лете, днем и нощью, и не приходя в дом ни к кому же, ту во граде от живущих человек о пищи и одежди никако же печашеся. Тако же и от богобоязнивых приходящих человек пищу малу приимаше себе и тем тело свое питаше, и то не по вся дни, от богатых же человек ничтоже приимаше потребных брашен. Таково убо бысть сего блаженного житие. Нужно же убо есть воспомянути от многих изрядных чюдес святаго праведнаго и блаженнаго Прокопия, мало нечто таково слово составити ми.

Л.22 об. О ЯВЛЕНИИ БОЖИЯ БЛАГОДАТИ БЛАЖЕННОМУ ПРОКОПИЮ И О ПРОПОВЕДИ ЕГО ГНЕВА БОЖИЯ ПРАВЕДНАГО НА ГРАД УСТЮГ И ЖИВУЩИЯ В НЕМ ЛЮДИ.

Сей убо блаженный и праведный Прокопий имеяше прозор Божия явления о страшнем чюдеси и необычном видении, и яко же водрузитися мысленныма очима в чюства слышащим и видящим человеком. И о сем убо и мы, братие, убоимся и вострепещем воспомянути вся сия и потщимся сохранити заповеди Господни чисто на угождение вечныя жизни. Вся же сия страсти, Божий пра

Л.23. ведный гнев его всего мира книги вместити не могут, яко же убо обретошася в лета жития нашего. Мы же, братие, вся сия страхования Божия люботрудне, елика сила наша Богу помогающу, ми да напишем в память последнему роду нашему. И иная некая от жития блаженнаго сего приснопоминаемаго праведнаго Прокопия и преславная и предивная бывшая от него чюдеса, и Божиим церквам сие воздадим. Тогда же бысть на утрени в день недельный, по отпении заутреннем, внегда же бо презвитери и диакони начаша

Л.23 об. воздвизати честныя кресты во святей и апостолстей церкви Пресвятыя Богородицы. Ту же собравшеся много от народа людей, та же иереи и диакони начаша пети молебны Господу Богу и Пречистей Богородице; ту же прииде в церковь на молитву и блаженный Прокопий, и по отпении молебнем начат святый вслух всему священному собору и приходящим людем поведати бывшее ему явление Божия благодати, сице глаголя:"Братие, покайтеся многих своих грехов. Аще ли не покаетеся и не останете первых своих злых грехов и за своя беззаконная

Л.24. дела не умолите у Господа Бога и Пречистую его Богоматерь и постом и молитвою и покаянием, и тем всем не очиститеся, и за то убо вси вы имате за своя многия грехи и за беззаконная неподобная дела зле погибнути огнем и водою и всему граду вашему". И яко же они вси слышавше сия его глаголы и неяша веры глаголемым от него. Блаженный же глагола к ним в пророка место ангелово явление и призывая всех на покаяние. Они же не послушаша его и не вняша себе словеси его в разум, понеже бо у тех у всех человек, живущих

Л.24 об. во граде, одебелеша сердца их злым бесовским омрачением; и о сем убо тяжко ушима слышаша и очи свои смежиша на прежняя своя неподобная дела и глаголаста в себе:"Яко сей человек юрод есть, и никогда же он смысленно глаголет". Видев же блаженный Прокопий оных человек непослушание и о том печален бысть велми. По отпевании же святыя литургии изыде святый ис церкви в паперть тоя же великия соборныя церкви Пресвятыя Богородицы и начат плакатися и рыдати непрестанно о погибели града того. Тогда же мнози человецы приходяще в паперть

Л.25. церковную Пресвятыя Богородицы и видеша его по вся дни непрестанно плачющася и глаголюще к нему:"По что ты, юроде, таковым великим плачем непрестанно плачешися, и которая ти бысть скорбь и печаль на сердцы твоем?"Блаженный же Прокопий глагола к ним:"Братие моя, бдите и молитеся Господу Богу и Пречистей его Богоматери, яко да не внидете вси вы вскоре в напасть". Тии же приходящии человецы мняще его яко немысленна умом и по том отидоша в домы своя. В третий же день тоя же недели изыде блаженный Прокопий ис паперти церковныя Пресвятыя Богородицы и

Л.25 об. пойде по всему граду Устюгу и начат проповедовати Божие явление всему народу со многими слезами и с воплем крепким, дабы они молилися Господу Богу и Пречистой его Богоматери и покаялися бы грехов своих, чтобы Господь Бог умудрился и отврати от них праведный свой гнев и не погубил бы града сего за беззаконие их, яко же Содома и Гомора. Они же и тоя вторыя его проповеди тако же не послушаша, но на своя темная прежная дела споюще, аки пси на падичную ядь скоро, яко же и прежде. По сем же блаженный

Л.26. прииде ко церкви Пресвятыя Богородицы в паперть и нача ту со многими слезами приносити молитвы своя Господови за град и живущия в нем люди. Бысть же во вторую неделю о полудне, найде внезапу над град Устюг облак темен, и бысть яко нощь темная. Люди же града того видевше таковое необычное превеликое необычное чюдо и о сем недоумевахся, что се бысть. И по сем явишася и восташа со все четыри страны тучи великия, из них же блистаяся молниное блистание безпрестани, и грому убо многу и страшну бывшу зело над градом Устюгом,

Л.26 об. яко ж не слышати, что друг со другом глаголати. Яко же бо и земли от того страшнаго труса непрестанно колебатися и трястися; огненныя же тучи хотяху соступитися вместо. Тогда же бывшу от молнийнаго блистания и от страшнаго огненнаго грому зною превелику зело. Народ же мног, видевше сие неизреченное и неисповедимое страшное чюдо, возмятошася и убояшася зело; и разумеша они свою погибель и усмотриша граду всему потребление. И абие вспомянуша блаженнаго Прокопия, бывшу от него проповедь. Вси скоро собрашася

Л.27. во святую соборну и апостолскую церковь Пресвятыя Богородицы, весь народ града того: мужи и жены богатии и убозии, раби и свободнии, даже и до ссущих младенцов влекуше с собою. И повелевают иереом и диаконом и всему освященному собору во святе соборней и апостолстей церкви Пресвятыя Богородицы, честнаго и славнаго Ея Успения, пети молебны и каноны глаголати Богородице, акафисту и Благовещению. Сами же тогда начаша молитися Господови со многими слезами и покрыша убо лицы своими помост церковный и папертный. И потом возведоша очи свои горе и руце свои возведше на высоту

Л.27 об. и начаша со многими слезами и с воплем крепким горко и жалостно вопити и глаголати псалом пророка и царя Давида, сице глаголюше:"Помилуй мя, Боже, по велицей милости твоей, по многим щедротам твоим. Помяни, Господи, нас, смиренных и недостойных раб своих, и приими нас, припадающих к тебе, Господи, с коленным поклонянием. Яко же привержении есми к тебе, Господи, от утроб и от чрева матерей своих, яко ты еси Бог наш, и тебе славу и благодарение возсылаем. Но понеже в суете дние наши проидоша, и удалихомся, Господи, от твоея превеликия и пребо

Л.28. гатыя милости и забыхом тя, Господи, во своей лености и непокорстве. И ныне надеемся вси мы на тя, Господи, просим твоея помощи и заступления от всякаго нахождения зла. И паки да зовем ти:"Призри, Господи, с высоты святыя своея на недостойныя рабы своя и предстоящия люди и чающе от тебе пребогатыя милости". Помяни, Господи, немощь и стонание наше и не погуби нас со беззаконми нашими. И ныне, Господи, сотвори нам очищенным быти от грехопадений наших и сотвори на нас презелную свою милость. Да во смирении своем пребудем и тмы греховныя

Л.28 об. убежим и во дни благообразно поживем и облечемся во оружие света и со дерзновением велиим прославим имя твое пресвятое от ныне и до века, яко ты еси, Господи, благ и человеколюбец всегда. Ныне и присно и во веки веков. Амин". И по том сташа пред иконою пресвятыя Богородицы и умлно припадающе со слезами, сице вопиюще:"О пресвятая госпоже Дево владычице Богородице, выши бо еси ты ангел и архангел и честнеиши всеа твари! Спаси, Госпоже, превеликою Твоею милостию и помилуй недостойныя рабы своя. Избави, Госпоже, нас и град сей сохрани добре от находящаго труса, от молнии огне

Л.29. нныя и от напрасныя смерти и от всякаго зла. И отврати, Госпоже, всякий гнев, подвизающийся на ны праведно. И посети нас, Госпоже, пребогатою своею милостию. И даруй нам, Госпоже, мирное здравие и тишину велию. И подай же, Госпоже, нам свое благословения и благодать и помолися к сыну своему, Христу, Богу нашему, да избавит нас праведнаго своего прещения". Та же прииде блаженны Прокопий с народом в соборную и апостольскую церковь Пресвятыя Богородицы и припаде пред честным Ея образом ниц на помост церковный лицем своим и моляшеся Господови и Пречистей его Богоматери со многими

Л.29 об. слезами не вставая от помоста церковнаго за град Устюг и за вся живущыя в нем люди, сице глаголя:"Спаси, Господи, и помилуй люди своя согрешаяющия, и посети, Владыко, место сие, и отврети праведный сво гнев. Ей, Владыко, молютися, Господи, Пресвятый Царю Небесный, пощади и помилуй мене бо ради пришелца страннаго на сию землю, таковый твой праведный бысть гнев не град и на люди сия. О Владыко, по что еси толиким гневом призрел на люди свое создание?"И потом блаженный Прокопий начат молитися ко образу Пресвятыя Богородицы, честнаго и славнаго Ея Одигитрия

Л.30. и Благовщению ея и глагола:"О Пресвятая Дево, Владычице Богородице! Ты бо еси нам всегда бысть помощница и заступница роду христианскому. И ныне к тебе, Госпоже, вси мы упование и надежду имеем непобедимую. Буди ты о нас, Госпоже, молебница и заступница к сыну своему и Господу нашему Исусу Христу о недостойных и грешных рабех своих. Яко к твоей убо превеликой милости прибегаем". Егда же сконча Блаженный Прокопий молитвы своя Господови Богу и Пречистой его Богоматери, в той же час явися чюдотворение велие и преславное от иконы Пресвятыя Богородицы, честнаго и славнаго Ея Благовещения всему же

Л.30 об. народу предстоящу ту и молящуся образу Ея и ведеша вси, яко искипе источник мира изо образа Ея. И простреся источник той свыше мира на землю и многия ту предстоящыя люди полия; мнози же человецы вземше сосуды и наполниша от мира того. В той же час и воздух пременися, и бысть тишина велия, и не бысть молнии ни грому, и разводяшеся облацы огненнии на все страны, и поидоста на места пустынная на места пустынная и тамо поломиша на пустынях многия лесы и дебри, многим и безчисленным камением поломило

Л.31. лес и дебри, овы древеса ис корени избиша, а иныя вполы положиша. От Устюга Великаго та пустыня отстоит за двадесят поприщ, имянует же ся Котовалская весь; в ню же ис тоя тучи испаде превеликое камение на землю, ломовный же лес види бысть и доныне многими человеки. На уверение и страсть последнему роду нашему сотвори бо Господь Бог таковое превеликое страшно чюдо. И от того страшнаго труса не уби громом и камением ни от человек, ни от скот никого же, но вси убо человецы и скоты сохранени быша превеликою его милостию.

Л.31 об. От мира же того, истекшаго от образа Пресвятыя Богородицы, знаменахуся мнозии болнии человецы и здравии быша, хромым течение сотворися, слепым прозрение даровася, беснованным и всякими различными недуги здравие бысть; но и две некоторыя жены беснованныя приведены быша сердоболи своими и помазаны от мира того, и в том часе исцеление получиша. По сем же радость велия во граде Устюзе, возвеселиша бо ся людие радостию великою зело и о сем чюдеси воздаша хвалу Господу Богу и Пресвятой его Богоматери, яко же бо избави их Господь от напрасныя погибелныя смерти,

Л.32. сам своею пречистой рукою изят и на свет я изведе. Но аще бы не Господь сохранил нас от тоя напрасныя смерти, то убо уподобилися быхом своим беззаконным житием Содому и Гомору; и сего ради казня нас и наказуя Господь, смерти же напрасно не предаст нас. Воистинну убо праздник сий нам исполнен бысть радости духовныя и веселия неизреченнаго, иже бо яви Господь превеликое чюдо на нас и излия великую свою милость преизообилно молитвы ради Пречистыя своея Богоматери и угодника своего ради праведнаго и блаженнаго Прокопия.

Л.32 об. Иногда убо бысть в прежнем роде во иерусалимских странах, и тамо явил еси Господи многая и безчисленная своя чюдеса. От Египта убо пророком Моисеом израильтеския люди сквозь чермное море проведе яко посуху, ис камени воду им источи и в пустыне четыредесят лет небесною манною препита. И потом от небес сниде на землю Сын, слово Божие, и в плоть человечю одеяся, и с нами на земли поживе, и многая чюдеса показа человеком: воду в вино преложи и слепыя человеки просвети, прокаженныя очисти, разслабленныя востави здравы и духи лукавыя от человек

Л.33. невидимо прогна, потом же распятся на кресте и копием в ребра своя прободеся и ис пречистых своих ребр источивый кровь и воду за избавление всего мира и спасение. Тако же и ныне в последнем роде нашем, в новем языце, явил еси Господи презелную свою милость и преславное и великое чюдо и посла на нас, грешных, свой праведный гнев, хотя нас тем своим наказанием казнити за грехи наша, яко же о сем пророк Давид глаголет:"Да возвратятся грешницы во ад и вси языцы, забывающие Бога". И молением Пречистыя владычицы нашея Богородицы и присно

Л.33 об. девы Марии и святаго праведнаго и блаженнаго, иже Христа ради юродиваго Прокопия той Божиий гнев превратил еси в щедроты. И хотящей казни быти на нас, недостойных, внезапу превратил еси Господи праведный гнев свой на милость и произведе от образа Пресвятыя своея матери от суха древа велий источник мира на уверение последнему роду истиннаго чюдеси и на спасение душ наших. Ныне же, братие, разумеем Божие человеколюбие и премногия щедроты его, яко убо праведен Господь во всех путех своих и преподобен во всех делех своих, и яко правдою и истинным

Л.34. судом своим навел еси Господи сия вся на ны грех ради наших. В начале убо ты, Господи, созда человека Адама, персть взем от земли и подобием образа своего почте и и посади его в райстем месте, присносушныя пищи вечных благ, и даде ему едину малу заповедь, яко от всех еже в раи да снесть, от древа же, еже ведети добро и зло, в он же час аще снеси, в той час смертию да умреши. Он же преслушався тебе, Господи, истиннаго Бога и творца своего, и прелстися змиею, и умершвен бысть грехом своим, и того ради изгнал еси Господи праведным

Л.34 об. своим судом от райския породы в прелестный и суетный сей мир и возвратил еси Господи в землю сиё, от нея же взял еси и. Мы же, братие, о сем разумеем, како убо Господь греха ненавидит, но единаго ради греха Адамова не пощаде возлюбленнаго своего сына, послал еси его спасения ради рода человеча. А мы, братие и сестры, многий народ согрешаем тмами на всякий день и час и грехи ко грехом прилагаем, и того ради Господь наказует нас во всем житии нашем, наводя на нас овогда глад и мор, овогда иноплеменных язык нашествие и прочими таковыми многими напастми

Л.35. и бедами. И не уподобилися убо выходом мы древним онем ниневитскому роду, иже бо и они согрешиша инога пред Богом, и посла Господь к ним Иону пророка проповедати им и граду их погибель и запустение за грехи их. Они же, убояшася Бога и рпияша проповедь пророка Божия, постившеся и покаявшеся вси вкупе от самого царя даже и до ссущих младенец и со скоты своими, тем убо они Божий гнев утолиша и спасени быша. И потом начаша жити и ходити по воли сердец своих, забывше Божие к ним милосердие, и глголати в себе:"Аще бы то пророк от Бога послан был к нам,

Л.35 об. то бы явил Господь казнь свою на нас". И начаша они первая своя дела беззаконная творити. Видев же Господь, паки прогневася на них и посла к ним иного пророка проповедати им о погибели их. Они же пророка Божия не послушавше, но по хотению сердец своих ходиша, и того ради погрязе их град и они в гезере ниневгитском. Потом же бысть трус велик, и прииде огнь от пустыни и оставшую их часть града ниневгитскаго всю пожже по глаголу пророка Божия. Тем же, братия моя возлюбленная, добре убо о сем чюдеси благодарим Господа Бога, иже бо зде ныне наказуя нас, смерти

Л.36. погибелной не предаст нас, яко Дух святый глаголет усты пророка Давида:"Днесь, аще гласа моего услышите, не ожесточите сердец ваших в прогневании его праведнем, по дни искушения иде же мя искусиша отцы ваши". Разумейте же, братие моя, пророческаго гласа силу, яко не о том дни глаголет, иже бо казнь прияша отцы наши за грехи своя, но о последнем грядущем дни глаголет. Мы же, возлюбленная братия, убоимся оного страшного дни и припадем и поклонимся вси любимии и приплачемся Господови нашему Царю и Богу. Приидите поклонимся, приидите и умилимся, приидите,

Л.36 об. возопием ему сердцем теплым:"Согрешихом, глаголюще, владыко, исповедаем прегрешения наша, беззаконовахом понеже повеления твоя презрехом, яко забыхом оправдания твоя и судбы, яко во след вожделений и помышлений наших поидохом, яко недостойно по имени и по обещании нашем пожихом, яко милосердие твое затворихом, яко человеколюбие твое спрятахом беззаконии и злюбами нашими, ими же пожихом, но не предаждь нас до конца имени ради твоего, ни же разруши завета твоего, ни же остави милости твоея от нас щедрот ради святых твоих.

Л.37. Не помяни беззаконий наших древних, но немощи наша и страсти помяни и призри с небесе и виждь от святаго жилища твоего и посети нас; посети виноград сей и наследие свое и исправи церковь твою, ея же насади десница твоя. Даруй нам мир, яко ты еси миру податель, благий Господи, честныя и святыя ради крове твоея, юже живота ради и спасения нашего пролиял еси. Сего ради потщимся и уготоваем дела наша на исхождение и страхом судии и владыки нашего уцеломудримся, приидет бо грядый, приидет и не замедлит, и кому ж до нам воздаст по делом нашим.

Л.37 об. Аз же, братие, яко слово должен воздати Богу о спасении душ ваших, начасте воспоминаю вам о сем и совещаю и молюся. Сия вся во уме имейте и пред очима своима, даже готовы обрящемся, егда приидет Господь. Не погубим прилучшееся время, ни же прилагающе время сие, а ино надеемся, даже не ленящеся и прелагающе кончиною постигнуты будем. Да даст же Господь плодовитым нам быти и подвижным и заповеди его воспоминающым, на сретение его преславное готовым обретися, даже и небесное царствие наследим и вечных благ наслаждение,

Л.38. их же да получим вси. Владыко Христе царю, иже в тебе верующии раби твои, молением и молитвами Пречистыя и преблагословенныя владычицы нашея Богородицы, матере твоея, иже от крове ея нам сочетался еси, ея же дал еси граду своему Великому Устюгу и всем верующим в тебе крепость и прибежище и утверждение и заступление, общая и великия надежди нашея, общая предстателницы и ходатайцы всех, Крестителя ради и Предтечи, святых ради апостолов твоих, святых ради мученник твоих, иже твоего ради имене кровь свою пролияша, и святаго ради и праведнаго Прокопия, иже тебе ради

Л.38 об. юрода, бывша его память празднуем днесь. Слава показавшему Господу Богу, предивная и прехвальная и неисповедимая бывшая чюдеса, яко прослави своего угодника и раба блаженнаго Прокопия. Всегда бо мы, братия, благодарим Бога и Пречистую его Богоматерь о сем превеликом чюдеси и прославим его за премногую его благодать, бывшую на нас, яко же апостол Павел глаголет:"Братие, благодать воздавате Богу, сотворишему всяческая, о неизреченнем его даре", но паче ныне должи есмы благодарити его о всех дарованиях, яко показа нам, недостойным,

Л.39. таковаго превеликаго светилника, глаголю же, праведнаго и блаженнаго Прокопия, просиявшаго в земли русте, на восточных странах, во граде Великом Устюзе в последняя времена жития нашего, яко быст житие его, чюдеса пред нами, видимо очима нашима, еще ему живу сущу, и о сем превеликом чюдеси утешение душам нашим немало бысть, от сего бо зело ползуемся. По истинне бо то великое дарование даровася ему от Бога на видение и слышание последним родом нашим. Отселе же прославим и благодарим пречестный праздник сей и торжество пре

Л.39 об. благословенныя Матере Бога нашего, честнаго и славнаго ея Благовещения и святаго праведнаго и блаженнаго Прокопия, устюжскаго новаго чюдотворца, яко да не без праздника останет день сей, вашего ради превеликаго чюдеси и нашего ради избавления и спасения от напрасныя горкия смерти; но яко же вы хощете тако и украсите праздник ваш, но обаче, братия моя возлюбленная, приидите, потщимся и подвигнемся и возопием умилно к Пресвятей владычице нашей Богородице и присно Девей Марии, сице глаголюще:"Всемилостивая владычице, источниче благосердия, источниче милости!

Л.40. Простри ко сыну своему пречистыя си длани, сохрани нас заступлением своим и кровом крил твоих запокый нас. Предстани всех ради христиан ходатайце, не остави покушенным быти нам истинным гневом твоим выше силы нашея, о них же согрешаем. Милостивное благоутробие свое к сыну и Богу твоему простирающи на моление прияти имать тебе ради осужденных раб приношаемую молбу и моление восхотевый сын твой быти. Испроси миру всему и нам полезная, царя нашего сохрани, способи ему на враги наша, ненавидящих нас и поругающих и обидящих нас,

Л.40 об. яже к сыну своему молитвами и молением князей его в покорении и страсте немздоприемных соблюди, воя его во всех языцех супостатных укрепи, народы в целомудрии и благочестии ходити благоволи. Избави сохранити града сего и всяк град и страны християнския, наставнице владычице Богородице, от нахождения и глада, труса же и потопа, огня и меча, от нашествия иноплеменник и междоусобныя рати. Обрати грядущии гнев на нас ходатайством ти и удиви на нас милость свою, пособствующи нам, на тя уповающим и твою о

Л.41. жидающим помощь. Поющих и труждающихся благослови и укрепи, плодоприносящих и доброделающих в преславнем и во святем празднице сем заступи и помилуй, промышляющих и пекущих о нищих целых и невредимых сохрани, и всех нас, архиерея и священники, началники и начинаемых мнихи и белцы, воя и простыя, старцы и младыя, мужи и жены, и всякаго возраста помилуй и посети и сохрани и соблюди, выше всякаго навета и злобы борющих и нападающих на нас видимых и невидимых врагов. Зане тебе имамы помошницу и предстателницу

Л.41 об. непобедиму и крепку заступницу, и покров, и прибежище душам и телесем нашим, свобождающую нас и спасающую от всякия беды и скорби и недуг рабы своих". Состави же ся праздник сей праздновати знамение от иконы Пресвятыя владычицы нашея Богородицы и присно Девы Марии, честного и славного Ея Благовещения во граде велицем Устюзе месяца иулия в 8 день на память святаго великомученика Христова Прокопия в славу и похвалу Пресвятыя Богородицы, Ея же молитвами и молением вси достойни будем обрести милость, празднующе всесвятое знамение Ея в славу и честь Христу Богу нашему, ему же

Л.42. слава со Отцем и с Пресвятым Духом ныне и присно и во веки веком. Амин.

О ВЕЛИЦЕМ ЗИМНЕМ МРАЗЕ И О ТЕРПЕНИИ БЛАЖЕННАГО ПРОКОПИЯ.

В та же времена и лета по пришествии на Устюг Великий блаженнаго Прокопия во осмое лето наставши зиме велице. И бывшу же мразу зело люту, и ветру бурну дыхающу превелику зело с снегом велиим и многим; тогда бо во граде Устюзе вси храмины наполнишася снегом тем. И всяк убо род человеч плотян сый, не могуще того зимняго великаго мраза и ветра терпети.

Л.42 об. Тогда же убо во граде и в селех и на путех мнози человецы и скоты померзаху, а нищии и странии Христа ради во граде Устюзе беду велию терпяху, стенуще и вопиюще из глубины сердец своих и о сем горко плачющеся и трясущеся непрестанно, гладным же недостатком измираху и померзаху от того лютаго мраза и собираху я во граде и по селом и на распутиях и наполниша ими убогия домы на горе у монастыря святого пророка Иоанна Предтечи. Друзии же человецы страждуще и тии снегом задыхахуся и умирах. Такожде тогда же от того великого мраза

Л.43. блаженный Прокопий во искореннии своем исторгашеся у церкви Пресвятыя Богородицы в папертном житиии. И всяка убо тогда птица летящая умре, неимущи что ясти. Преблагий же Господь Бог виде создание свое от лютыя зимы погибающа и своего раба блаженнаго Прокопия зелное терпение — как он зимний мраз терпяше нагим своим телом день и нощь, не имея у себе храмины ни портища тепла, ни постели мякки, ни рогозинницы ко упокоению тела своего, но токмо едину ризу раздранну ношаше на теле своем срамных ради телесных своих уд,

Л.43 об. и тем бяше покрыто тело его, а иного ничто же требоваше святый от мирских живущих человек, всегда же неотступно пребывая во угле папертном у церкви Пресвятыя Богородицы. Тогда же помышляя во уме своем блаженный Прокопий, камо ся ему дети от зелнаго того зимнаго мраза и на которой стране града ходити и тем хождением толикий бы мраз утолити; и ничто же ему бысть в помышлении том. И стояше той зимний мраз многия дни, и никто же убо от древних человек помняше такова зелна мраза, ни ветра бурна. И по двою неделю, преставшу

Л.44. ветру томувечеру сущу, блаженный Прокопий, Божий угодник, изыде ис паперти и прииде во уголный двор, иже за церковью Пресвятыя Богородицы, к рабу Божию именем Симеон, ко отцу великого Стефана, епископа Пермского. Светлым видением и сладким смехом бе бо лице его от многаго веселия, яко солнце светлостию. Раб же Божий Симеон, видев приход блаженнаго Прокопия, и почюдися, мняше убо во уме своем, яко умре святый Прокопий от зелнаго того мраза, и пожале о нем душею своею. Та же воста раб Божий Симеон от сидения своего

Л.44 об. и обят блаженнаго Прокопия за выю и облобыза его любезно и потом седоста и пребыста в любви Христове на мног час. И по сем нача блаженный Прокопий глаголати духовно к рабу Божию Симеону, сице:"По что ты о мне, рабе Божий, сетуешь вельми? Ныне, брате, останися от толиких слез твоих, имею бо ти нечто полезно рещи". Раб же Божий Симеон глагола к святому:"Что ми, брате и господине, хощиши глаголати, рцы ми вскоре". Блаженный же Прокопий глагола ему:"Брате симеоне, отселе веселися и не унывай, уготови ми прежде трапезу со брашном, да напитаемся

Л.45. днесь". Раб же Божий Симеон, слышав сия глаголы от блаженнаго Прокопия, с радостию повеле вскоре сотворити отроку своему трапезу з брашном. Слышав же отрок от господина своего, вскоре сотворяет повеленное ему. Блаженный же Прокопий глагола к Симеону:"Господине предобрый и брате, повеждь ми всю истину, почто ты о мне, страннем, пожалел еси помышлением своим, яко уже от мраза сего зимняго померзох и умрох. Братия же моя, нищии и страннии, тогда вси бяху невеселы. И яко же хранит Господь вся любящая его и близ бывает сокрушенных

Л.45 об. сердцем и смиренныя духом своим пречистым спасает. Ты же, неведный сего господине, яже глаголеши всею душею своею к моему лишению. Но аще, чесны отче, учнеши мене, лишенника, впредь тако любити, то узриши от мене дары моя к себе и восприимеши многу утех души своей. Но обаче не мози ты, брате и господине мой, о сем впредь по мне жалети и сего ради плакатися, велика бо радость бывает тем человеком, иже бо всею душею скорбя от таковых и всем сердцем своим о такове духовне деле на Господа Бога уповают. И того ради им Господь воздает добрая в жизни сей

Л.46. и в будущем веце, и мзда им о сем бывает немала". Сия же глаголы раб Божий Симеон слыша от блаженнаго Прокопия и помысли во уме о блаженном, яко бысть ему в той презелный мраз некое явление от Бога, и чюдо некое сотворилося ему по дарованней ему благодати от Бога, того бо ради сам о себе святый изообразил. И по сем раб Божий Симеон начат ко блаженномй Прокопию сладкими словесы беседовати и лобызати его любезно и вопрошати блаженнаго Прокопия о зимнем мразе и о терпении его, глаголюще:"Молютися, рабе Божий праведный Прокопие, и за

Л.46 об. клинаю тя живым Богом, сотворшим небо и землю. Повеждь ми всю истину о сем, где еси пребывал, святый отче Божий, в сии презелный зимний мраз. Не потай от мене, грешна человека, даннаго ти дара от Господа Бога; и како твое нагое тело терпело днем и нощию сию зимную лютую грозу, яко же убо аз вижу издавна на тебе Божию сшедшую благодать". Слышав же блаженный Прокопий таковыя глаголы от раба Божия Симеона, и воздохнув из глубины сердца своего, и рече:"Брате Симеоне, яко от мене ли хощеши полезных словес слышати, аз бо есмь, яко же видиши мя, похаб,

Л.47. и что ли от мене хощеши, юрода суща, слышати полезно, но всегда убо есмь и по вся дни на улицах града на гноищах и на смертьищах валяхся и Бога есмь лишен, и в боголишении своем грешен есмь, присный мой брате. Но обаче превеликая твоя любы и милость нудит мя и не хотяшу ми исповедати тебе тайны моя. Но прежде, честный отче Симеоне, заклинаю тя Господем Богом, сотворшим небо и землю единым словом своим и всю тварь, видимую и невидимую, с единородным своим сыном, с Господом нашим Иисусом Христом и с Пресвятым Благим и Животворящим

Л.47 об. Духом, да не исповеси ничто же о житии моем никому же от человек, дондеже есмь в житии сем прелестнем, да исповем ти твоея ради любве". Симеон же клятся ему зело необычною ротою, глаголя:"Воля Божия да будет ми, яко могу сохранити аз сия тайны твоя святыя добре и сказанныя ми тобою добре сладкия беседы, святый отче Божий". Тогда же блаженный Прокопий отверзе своя медоточная уста и рече:"Аз, брате Симеоне, яко же виде еси зелный сей мраз и бурю снежную великаго ветра от, исперва отнюдь не возмох стерпети

Л.48. мраза того великого и отрекохся живота своего, помышляя о сем во уме своем, что ми сотворити, и яко же ты мя видиши ныне нага стояща и седяща и неодена портищи теплыми и боса суща и храмины теплы у себе неимуща, где бы мне главу преклонить. Аз же нощию изыдох ис паперти церковныя Пресвятыя Богородицы и приидох к спротивным к малым храминам, к живущим ту нищим человеком, иже прямо живущим соборныя церкви, хотя у них мал покой обрести телу моему и отдохнути нечто мало от зимняго того мраза. Они же, слышавше приход мой

Л.48 об. и не давше ми внити в храмины своя, но изшедше з дреколми и отгнаша мя от себе яко пса некоторого, брезгующе мною и глаголаху и кричаху на мя:"Поиди ти, похабе, отсюду прочь". Аз же от них отбегох и не обретох себе места покойна, где бы мне опочити мал часец от зимняго того люта мраза, и отчаяв весь живот свой и потом глагола в себе:"Буди имя Господне благословенно отныне и до века, яко аще и умру Господа ради, то лучше ми сего прелестнаго суетнаго света. И во что ми Господь вменити, буди воля его святая, яко убо праведен Господь и непорочен во всех путех своих,

Л.49. преподобен во всех делех своих и милостив и долготерпелив к роду человеческому; иже и мне той сотворит в правду, яко да с сею зимою и терпение ми подаст". И потом пришед аз в пустую храмину и ту обретох во едином угле пси лежащи; аз же ту близ их легох, яко да согреюся от них. Тии же пси, видевше мя и скоро восташа и отбегоша от храмины и от мене. Аз же востах и глаголах в себе, яко лишену быти ми не токмо от Бога и от человек, но и пси гнушаются мене и отбегают. Видиши ли, господине и честный отче Симеоне, яко толико

Л.49 об. грешен есмь человек. Нищии бо человецы и пси брезгуют и гнушаются мною, и вси супротивни меня быша и отгоняще мя от себе. Да что потом хощу сотворити. Тии же нищии глаголаху мне:"Иди ты да умри лживе и юроде, зде бо от тебе несть нам спасения". Аз же в печали си глаголах в души своей неудобна и непотребна словеса. И потом прииде ми ум ко спасенному пути, и приидох в паперть ко церкви Пресвятыя Богородицы и ту седох, скорчася от великого того зимнаго лютаго мраза и плакахся велми и моляхся господови и часто взирая на

Л.50. образ Господа Бога и Спаса нашего Иисуса Христа и Пречистыя его Богоматере сердечныма очима своима и мняше убо во уме своем, яко уже ми единожды вздохнути. И омерза ми все мое калное смердящее тело и посиневше. И по сем внезапу очютих себе некую теплоту и отверзох очи мои и видех некоего юношу, стоящи близ мене, видением прекрасна зело — лице его бяше светяшеся яка лучь солнечный, — имея в руце своей яко ветвь некую, всяким цветом червленным и белоросным исполнена. Не такова же суть ветвь та, яко же

Л.50 об. ветвь мира сего прелестнаго, но испестренна некако инем цветом. И видением прекрасный же он юноша, держа в руце своей оную ветвь, воззре на мя и глагола ми:"О, Прокопие, где еси ныне пребываеши!"Аз же глаголах ему:"Сежу во тме, окован железом и сени смертно". Той же юноша глагола ми:"О, Прокопие, како ты глаголеши ми!", и удари мя тою цветною ветвию в лице мое и глагола ми паки:"О, Прокопие, приими си живот непобедимы всему своему телу и очищение и разрешение болезни твоея от зимняго сего великого мразу".

Л.51. В той же час вниде в сердце мое воня цветная; благообразный же он юноша, яко молния светла отиде от мене и невидим бысть. И оттоле приложися ми жив". Скончав же блаженный Прокопий сия своя душевнополезная словеса к рабу Божию Симеону. И в той час воста, изыде из дому его ко церкви Пресвятыя Богородицы в папертное свое житие на обычную свою молитву и на коленное поклоняние и на духовное чюдотворение. Раб же Божий Симеон почюдися зело глаголанным от святаго и прослави Бога о сем, яко показа ему Господь такова свята мужа,

Л.51 об. и скры тайныя его глаголы, яже беседова с ним, и никому же поведа о житии святаго Прокопия и о великом его терпении, донележе он изыде от жития сего; по преставлении же святаго все написа поряду, еже виде и слыша от святаго, ползы ради душевныя последним родом нашим.

О ВТОРОМ ПРОРОЧЕСТВЕ БЛАЖЕННАГО ПРОКОПИЯ И О МАРИИ, МАТЕРИ СВЯТАГО ОТЦА СТЕФАНА, АРХИЕПИСКОПА ВЕЛИКОПЕРМСКАГО.

Сеже, братие, слышахом мы предивну повесть от древних онех мужей о втором пророчестве блаженнаго Прокопия. Бысть же сице

Л.52. в та же лета, егда еще жив сый блаженный Прокопий. Прилучися итти мимо соборну церковь Пресвятыя Богородицы, честнаго и славнаго Ея Успения, во время вечерняго пения некоего посадного человека дщери именем Марии, трех лет сущи ей, с родителема своима. Тогда же множеству людей стоящу у соборныя церкви, слушающе вечерняго пения. В то же время востав блаженный Прокопий, изыде ис паперти церковныя, и по обычаю убо своему святый являшеся людем яко юрод и похаб, и чрез обычай свой блаженный Прокопий сотвори на пути той дщери поклонение земное

Л.52 об. и глагола во услышание всем людем, яко сия девица Мария грядет, мати великаго отца Стефана, архиепископа и учителя Пермского. Видевше же тогда и слышавше мнози человецы ис паперти церковныя. И начаша они тому словеси и пророчеству блаженнаго Прокопия дивитися. В то же время еще в пермстем языце не было ни единаго человека, верующа во Христа, но вси убо там живущи человецы помрачени бяше прелестию сатанинско. и поклоняхуся они болваном и жруще бесом и идолом. Блаженный же Прокопий обычай таков имаше: в зиме и в лете

Л.53. хождаше по граду во единой раздранной ветхой ризе, и тое с плеча спустя, и во единых сапозех раздранных, ветхих и не в подошвенных, и почасту ходя по вся нощи ко святым Божиим церквам и моляшеся Господови, иного ничто же имяше у себе, токмо три кочерги в левой своей руце своей ношаше. Мнозие же человецы во граде Великом Устюзе пророчеству и безмерному терпению блаженнаго Прокопия дивляхуся выну. И всегда же убо кочерги святаго простерты главами впрям, тогда изобилие велие того лета бывает хлебу, и всяким иным земным

Л.53 об. плодом пространство велие являюще. А когда кочерги его бывают непростерты главами вверх, и тогда хлебная скудость является, и иным всяким земным плодом непространство и скудость велия бывает. Приходя же блаженный Прокопий часто на брег Сухоны–реки и ту седяше на камени и зряше очима своима превозящихся человек в малых ладийцах чрез Сухону–реку и плавающих и о них моляшеся, даровал Господови дабы им Господь сотворил тихое плавание. И возлюби он то место и камень, на нем же блаженный седяше в животе своем, и потом глагола к людем с молением

Л.54. велим:"Да положат кости моя на сем месте и камень той, на нем же аз ныне сежу на моей могиле. И за то подаст вам Господь, вся благославляя, в день праведнаго суда своего, и восприимете от него мзду велию". Тогда же блаженный воста от камени и пойде в паперть церковную Пресвятыя Богородицы по обычаю своему к ночной молитве, всегда бо он угождая Господови житием своим и душею честною. Поживе же блаженный Прокопий у церкви Пресвятыя Богородицы, честнаго и славнаго Ея Успения, времена и лета доволна.

О ПРЕСТАВЛЕНИИ СВЯТАГО ПРАВЕДНАГО И БЛАЖЕННА ПРОКОПИЯ.

Л.54 об. Не по мнозех же днех открыся от аггела Господня блаженному Прокопию преставление его и соух телсных разрешение и еже убо конечное ему ко Господу Богу приближение. И по сем блаженный Прокопий исшед нощию ис паперти церковныя и прииде к монастырю Пресвятыя Богородицы, честнаго и славнаго Ея Введения, и собора великаго архистратига Божия архаггела Михаила и прочих небесных сил, и став тоя же нощи у святых врат монастырских и ту помолися Господови с коленным поклоянием, сице глаголя:"Владыко Господи Иисусе Христе, сыне Божий, вседержителю, творче

Л.55. всея видимыя и невидимыя твари! Ныне аз, грешный и недостойный раб твой, предаю душу мою в руце твои, ты бо еси, Господи, всадил еси в сердце мое велие желание ко истинней вере и извел еси от латинска нечиста языка и веры. Ты бо еси, Господи, изведе мя из отечества моего и возведе мя на истинный свет от тмы несветимыя в познание тебе, истиннаго Бога. Ты бо еси, Господи, наставивый к своему хотению и спасителному истинному пути. Ты убо, Господи, избравый мя посреде раб твоих и причте мя ко своей благости пребывати во вся дни

Л.55 об. живота моего. Ты бо еси, Господи, не остави мене изгибнути со беззаконми моими во тме и сени смертной отечествия моего и в скверной нечистоте быти. Ты бо еси, Господи, изведе мя от мира сего прелестнаго и богатства неистоваго и приведе мя на место покойно. Ты бо еси, Господи, упование и надежда и заступление животу моему. Ты бо еси, Господи, научи мя молитися пресвятою молитвою, и се ныне, Владыко, твоею превелико. молитвою к тебе припадая и молюся, и ныне волю твою скончаваю и творю. Ты бо еси, Господи, подавай ми всякое терпение в делах

Л.56. и в напастях от юности живота моего. Ты бо еси, Господи, дарова ми во юродстве и странстве мнозем пребывати нагим моим телом и во укорении человеком быти. Ты бо еси, Господи, дарова ми превеликое свое явление и дар Божия благодати над градом Устюгом. Ты бо еси, Господи, дарова ми велий зимний мраз претерпети в маловременном сем прелестном житии. Ты бо еси, Господи, дарова ми живот и ис тля мя изведе и сохрани мое тленное тело от мраза невредимо. Ты бо еси, Господи, не отрини мене от себе и до исхода ис телеси души моея и скончай, Владыко, хотение мое

Л.56 об. во своей превеликой благости пребыти до конца и мирно и безмятежно преити начала и власти темныя". И тако блаженный Прокопий многия испусти слезы от очию своею и скончав свое моление Господови на исход души своей и отиде от святых врат того же монастыря на конец мосту и ту возлег и руце свои крестообразно пригнув верх утробы своея и тако с гласом вкупе испусти дух свой в руце Божии в лета 6811 [1303] месяца иулия в 8 день. Святая же его непорочная душа взята и несома бысть святыми аггелы на небеса с радостию к престолу Вседержителеву,

Л.57. блаженное же и многострадалное тело его остася на земли. Тоя же нощи лежаше тело блаженнаго Прокопия никим же от человек стрегомо и невидимо бысть. И абие воста буря внезапу велика зело со многим снегом тоя нощи, и паде снегу на две пяди во граде Устюзе и около града во всех весех на всякия овощи земныя и на хлебныя нивы. Заутра же восташа человецы и видеша очима своима таковый великий снег и убояшася и начаша они таковому Божию чюдеси дивитися; в той же таковый снег и растаяв,

Л.57 об. овощем же и всяким земным нивам и хлебу ничто же бысть. Тогда же у соборныя церкви Пресвятыя Богородицы у утренняго пения не бысть блаженнаго Прокопия. По отпении же утреннем изшедше из церкви вси иереи и диакони. Начаша они у градских человек вопрашати о юродивем Христа ради Прокопии: что ради яко не бе с нами днесь у утренняго пения, никогда же бысть таковый день, еже бы не быти ему у вечерняго и утреннаго пения и у литургийныя службы, и что ему бысть. И ни от кого же о нем ничто же не уведаша. Потом же взыскание сотвориша

Л.58. о нем по всему граду и по святым Божиим церквам, взыскующе его безпрестани по три дни. В четвертый же день едва обретоша мертвое его тело на голей земли лежащо близ монастыря Пресвятыя Богородицы, честнаго и славнаго Ея Введения, и святаго великого архистратига Божия Михаила и прочих небесных бесплотных сил, от святых врат конец. Видеша же тогда иереи и диакони над телом святаго и праведнаго и блаженнаго Прокопия преждепомянутую снежною бурею нанесло снегу великую громаду сувоем вверх, яко же мнимо быти в две сажени. На удивление всем человеком

Л.58 об. яви бо Господь таковое превеликое чюдо во граде Устюзе. Потом же взяша святое и честное и многострадалное его тело, скутавше и положиша е во гроб и понесоша на главах своих всем освященным собором, со псалмопением и со свещами многими и с кандилы, и последоваша по нем народ мног до соборныя церкви Пресвятыя Богородицы. И принесше тело его и поставиша е в соборной церкви, донелиже соберутся вси людие града Устюга на погребение многострадальнаго тела его. На месте же том у монастыря конец мосту прямо святых врат, иде же обретено

Л.59. бысть пречестное тело его, ту поставиша крест каменной на взрубце. Ныне же устроена бысть на том месте часовня; крест же той видим человеки и до сего дни. Потом же снидеся народ мног с женами и детми во святую соборную и апостольску. церковь Пресвятыя Богородицы. И начаша в соборней церкви всем освященным собором иереи и диакони на телом блаженнаго Прокопия надгробныя песни пети, предстоящи же ту мнози человецы плачющеся по нем, воспоминающе прежнее его пророчество и проповедь, явления ему, о нахождении гнева Божия — тучи огненныя,

Л.59 об. и молением его от того Божия гнева мы избавлени быхом и сохранени, и иная многая чюдотворения его поминающе. По отпевании же том надгробном погребоша его честно близ брегу великия Сухоны, иде же бяше он седел при животе своем на камени близ церкви Пресвятыя Богородицы.

О ПОСТАВЛЕНИИ ЧАСОВНИ НАД ГРОБОМ БЛАЖЕННАГО ПРОКОПИЯ И О НАПИСАНИИ ОБРАЗА ЕГО.

По преставлении же и погребении блаженнаго Прокопия немало время прейде, и все его житие и деяние бес памяти бе. Милосердный же и премилостивый Господь Бог, живы

Л.60. на небесах и призирая на землю, восхоте угодника своего на сем месте велми прославити многими и неизреченными своими чюдесы. Бысть же в лето 6966 [1458]. Прииде от московского государства, державы руския земли, на Устюг Великий нищий человек нищим образом, именем Иоан, и слышит он от живущих градских человек о житии святаго и о пророчестве Божия явления и о терпении праведнаго Прокопия и желание приим в сердце свое. Повеле написать образ подобия святаго праведнаго Прокопия и постави над ним часовню малу, иде же

Л.60 об. погребен бысть; ту же принесе и образ написанный подобия его и постави его в часовне на поклонение приходящим ту человеком. Тоя же соборныя великия церкви Пресвятыя Богородицы иереом и диаконом вниде в сердца их лукавый помысл, и не восхотеша они того видети и слышати и памяти сотворити блаженному Прокопию и того предреченнаго мужа Иоанна от тоя новопоставленныя часовни отгнаша и часовню раззориша и сломаша и разметаша, написанный же образ подобия его снесоша оттуду.

Житие 1660–е гг. Вторая редакция.

(вторая редакция) ОР РГБ. Ф. 92. № 48. Л. 13 об. — 22 об. 4°. Полуустав. Водяной знак"кувшин"(Лихачев, № 1735 — 1547 г.).


л.13 об. Месяца июлия в 8 день. Повесть душеполезная святаго Прокофия, Христа ради уродливаго Устюжекаго. Благослови, отче. Аминь.

О 1 страшном чюдеси и необычном видении. И яко въдрузится мыслене в иювство, слышащим убоимся и въстрепещем, поминающимся подщимся сохранити заповеди Господня, угождения жизни и страсти, иж всего мира книги вместити не могуть. Иже ся обретоша в те годы любяще труды и печальнех и на славу же Богу и на память род инех жития церковнии повестници написающе, се же всего того деля воспоминаем и на серду принесохом, но иже мы хощем написати о пре/ л.14/славном сем чюдеси, еже в наша лета содеяшася.

Въ граде Устюзе бысть некии муж уродивыи Христа ради именем Еунтропеи, живяше в паперти у церкви святыя Богородицы, честнаго Ея Успения, о пищи и одежи никако же печашеся о том и от приносящих ему никако ж приимаше, имяше бо в себе прозоръ Божия явления. Бысть же на утрение, егда въздвизають честные крестъ и собрашася вси людие, блаженныи ж муж возвести видение, бывшее ему, всем людем, глаголя:"Аще не покаетеся греховъ своих и Господа Бога не умолите за безаконие ваше, то зле погибнете град сии". Они ж того не послушасте и не внимасте, удоле бо сердце / л.14 об./ людеи сих, ушима тяшко слышаше и очима своима смежище. Видевъ ж блаженъ онъ муж непослушание люде тех, рыдая и плачася непрестанно о гибели града того. И приходящии глаголаше мужу:"Что плачешися непрестанно?"Он же глаголяше им:"Бдитеся Богу да не внидете в напасть". Они ж яко смысленнаго его глаголюща.

Бысть же яко въ другую неделю о полудни бысть же тма и мракъ, и недоумевахуся людие, что есть. И по сем явися восходяще огнь со всех странъ, и грому убо страшну бывшу, не слышавшу же другъ ко другу, что глаголяше, яко земли колебатися, пламени ж разливашеся непрестанно, огненыя же / л.15/ тучи хотяще ступитись вместо, и бывшу же зною велику от огня того. И разумеша людие потребление граду и свою погибель, и собрашася въ церковь вси людие, мужи и жены, богатии и убози, и раби, и свободни, даж до уности, и прикрыша лице землю и очи свои възведши горе, руце свои въздев на высоту, со слезами вопияху и глаголюше:"Помилуи нас, Боже, по велицеи милости твоеи. Помяни нас, смиренных осуженных рабъ твоих. Прими нас, припадающих к тебе, приверъжение изо утробы, от чрева матере нашея Богъ нашь ты еси, но зане исчезоша в суете дние наше, обнажихомъся от твоея помощи, но надеющихся тво/ л.15 об./имъ щедротам зовемъ. Призри, Господи, от высоты святыя твоея и на люди твоя предстоящия, чающих от тебе богатую милость. Помяни, Господи, непомощ нашу, не погуби нас безаконии нашими, но сотвори великую милость смирением нашим, да тмы греховные убежавши, во дни правды ходим, облъкшеся въ оружие света, и з дерзновением прославим о всех тебе единаго истиннаго человеколюбца Бога, пред иконою святыя Богородици, припадающе со слезами, умилно въпияху:"О пресвятая госпожа Дево Богородице и Владычице! Вышеши бо еси Госпожа всех анггелъ и арханггелъ и вся тварь и честнеиши. Милостию своею, Госпоже, спаси и помилуи. Избави ны, /16/ Госпоже, град сии от труса находящаго и огня, и напрасные смерти, и от всякаго зла. И отврати, Госпожа, всякъ гневъ, подвизающись на ны. Госпоже, милостью своею миръ и здравие подаи же нам благоволением и благостию единороднаго Сына и Бога твоего Господа Исуса Христа". И бысть же в тот час, явися чюдо преславно от иконы святыя Богородицы, честнаго Ея Благовещения. Людем же зрящим, молящимся образу Ея, видяще же кипяще источник мира от от образа Ея. И простре источникъ мира с высоты на землю и многи люди полыя, предстоящия ту. И вземши же сосуды, наполниша миру того. И в тотъ же час бысть тишина в высоте велия, ни /16 об/ грому не бывшу, и разводящися облацы огненые на все страны и поидоша на места пустынныя ж и попалиша дебрие на пустынях и камением биша. От того же мира знаменовахуся, болни здрави быша, хромимъ течение сотворих, а слепии прозираху, беснии одеръжимых недуги здрави быша. Две жены беснованны приведени быша и помазахуся от мира того и в том часе исцелени быша. Бысть же радость велия, възвеселишася людие и въздаша хвалу Богу, иже избави их Господь от напрасные смерти, яко от самоею рукою погибельною изятъ и на светъ изведетъ, /17/ аще не бы ны Господь оставить насъ, яко Содому и Гомору уподобилися быхом, показая и наказа Господь, а смерти не предасть ны.

Воистинну, братие, празникъ сеи нам полнъ радости и веселия, еже яви де Господь чюдо свое на нас и излия милость свою обилно молитвою Пречистыя его Матери. Иже тамо, въ Иерусалимьских странах, тмами чюдесъ показавъ Господь: Моисея исквозе Черъмное море проведе, ис камени воду источи в пустыни препитавыи. И по том сниде Сын, слово Божие, на землю и въ плоть одеявся и многи чюдеса показавъ: воду в вино преложив, слепыя просветивъ, прокаже/17 об/нныя очисти, раслабленныя въздвигнувъ, духи лукавыя от человекъ отгна, та ж и до распятья, иже на кресте вознесеся и копием прободеся в ребра. Ис пречистых ребръ своих источивыи кровь и воду и за избавление и спасение всего мира. Разумеите же, братие, чюдеси сего силу, ея же яви Господь милость свою на нас, и на новом языце. Грех ради всего мира сам Господь нашь Исус Христосъ на крестъ взыде, смерть приятъ, ис пречистыя своея плоти источивыи кровь и воду за спасение всего мира нас ради. Грех ради наших посла Господь гневъ свои на нас, казнити ны хотя за грехи наша, /18/ яко же пророкъ рече:"Възвратяться грешницы въ адъ и вси языцы, забывающи Бога". Молением Пречистые Девы Богородици, его матери, гневъ свои преврати в щедроты, казнь, на нь хотящую быти, преврати на милость; произведе нам от сухаго древа источникъ мира на спасение мира. Разумеите же, братие, Божие человеколюбие и щедроты его, яко праведенъ еси Господи въ всех путех своих, яко правдою и судом истинным навел еси на ны грех ради наших. Создавъ убо человека, прьсть взем от земли и образом своим Боже почит, полож его в раи, пищи бесмъртия жити воспрелти вечныи /18 об/ Богъ. Но преслушавши тебе, истиннаго Бога, создавшаго его, прелестию змеиною прелстивъшися, умершвен же бысть своим грехомъ. Изгналъ еси его праведным Боже от рая в миръ и возвратилъ еси в землю, от нея же взятъ бысть. И видя его въ тление суща, но милосърдыи Богъ премилостивыи бо, не отвратися создания своего вконець, ни же забы дело рукъ своих, и посла единочаднаго Сына своего Господа нашего Исуса Христа в миръ грех ради, единаго ради человека и единаго ради деля его греха не пощадевъ сына своего възлюбленнаго, Господа нашего Исуса Христа, и на смерть вдавъ. Мы ж, /19/ братие, многими народы, а тмами согрешаем, грехи ко грехомъ прилагающе, то нас ли не казнитъ, яко же пророкъ рече:"Единою месть отдадим". Глаголет Господь:"То Бог ны помилуетъ". А мы раздражаем его не уподобимся египтяном, и еже преже согрешивша къ Богу, посла Богъ к ним пророка провозвести о погибели града за грехи их. Они же преж послушавше пророка, прияша постъ и молитву и гнева Божия умолиша и спасени быша. И потом учаша быти в воля сердець своих и глаголяще:"Аще ли быллъ сеи пророкъ от Бога, то явилъ бы Господь казнь свою на насъ". И начаша первая дела творити. / л.19 об./ И посла Богъ иного пророка и прорече на Неневгею, яко Неневгеи град погибнути имать водою слатною и огнем. Они же того не послушаще, и бысть же повелением Божиимъ за грехи их бяше ту езеро, нарицаемое Неневгия, трусу же бывшу и погрузися град, и огнь пришедъ от пустыни и оставшую часть пожже по пророчеству святаго.

Тем же и мы, братие, добре убо благодарьствуемъ Бога, иже ныне наказа зде, яко ж Духъ святыи глаголет усты Давыдне:"Аще глас его услышите и не ожести сердець ваших, яко во прогневании во дни искушения и де же искуша мя отци ваши". Разу/ л.20/меитеи ж, яко не о том дни глаголеть Давидъ, иже казни подаша за грехи их, но и оном дни глаголеть глаголы же. Братия, убоимся дни того, егда когда разгневается Господь за грехи наша, тем же, возлюбленнии, подщимъся гневъ Божии укротити покаяниемъ и слезами и милостиною и заповеди его присно соблюсти, любовию другъ друга чтяше, яко сам написавъ и предасть намъ в законе, рекъ:"Не убеи, не укради, лживъ послухъ не буди, чти отца своего и матерь, възлюби ближняго своего, аки сам себя, а не иже есть по роду ближняго, но и всякого живущаго в вере Христове, / л.20 об./ алчнаго напитаих, страннаприемлюще, нага одевающе, Божия рабы честно творяще ти бо бдятъ о душах ваших, къ церкви тщатися день и нощь, тутъ бо очищаемся от грех, трезвящеся от нуд, со чистотою, совестию приступаем к телу Божию и крови, не имуще вражды ни на кого же, не льстимся любяще, но сердцем же и лицемъ почтуще другъ друга такими жертвами Богу угождати и гневъ Божии укротити и молением Пречистыя Божия матери, паче же надеяние и заступление наше, но надеющеся, Владычице, на милосердие твое. Словеса же рече Сыну в молитве:"Царю небесныи, / л.21/ приими всякого человека, славящаго тя, призывающе имя твое, и всяко место, иде же бываеть память имени твоего, освяти место и прославляющаго тя прославлю именем моим, приемля их всяку молитву и мои обетъ словом надеяся восхотех. Да не бес праздника останеть святыи сеи день твоего чюдеси, нашего избавления, спасения от напрасныя смерти, но яко же ты хощеши украсити честныи праздникъ твоею чюдеси, да прославляющи тя возвеселять и видящи бо, Господи, имени твои празникъ сияющи, тако же сие прослави, яко же те град сущи на нас / л.21 об./ милость свою излия и милостивно покры. Тако же и ныне нас, рабъ твоих, покры нас кровом крилу твоею и миръ и здравие даи же нам, спаси ны по множеству милости Сына твоего в сеи векъ и в будущии, и вся приходящая к тебе со страхом и с верою, надеющихся на тя скорое наше заступление и помощь. И уставиша же такоя праздникъ праздновати месяца июля в 8 день на память святого мученика Прокофия. Богу нашему слава всегда.

Ныне, в день праздника бысть чюдо преславно у гроба святаго чюдотворца Прокофия: въ 1 час нощи некии человекъ боленъ очима, едва виде, доитти до гроба святаго / л.22/ чюдотворьца Прокофия, и умъ ему метяше ноги и руки, все бо тело болитъ, именем Куринъ Федоровъ сынъ Бедрина, родом устюжанинъ, живяше о бозе в болезни тои 7 лет; и какъ начаша пети моленъ чюдотворцу Прокофию, прочтеи Евангелие, приложися ко гробу чюдотворцову человекъ тои, и в том часе бысть здравъ, не одеръжим никим недугом.

Инъ человекъ некии беснующь и разъслабленъ и немъ принесенъ бысть своими домочадци въ церковъ. Месяца февраля въ 1 день бысть чюдо преславъно въ граде Устюзе у гроба святаго чюдотворца Прокофия на молебене после чтения божественнаго / л.22 об./ Евангелия: бы некии мужъ именем Ефремъ Федоровъ сынъ Верьнишин с Щаръденьги бысть немъ и без ума метяшеся и беснующе, исцеление получи у гроба святаго чюдотворьца Прокофия и отиде в домъ свои, радуяся, славя Бога и святаго чюдотворца Прокофия.

Богу нашему слава ныне и присно и в веки веком. Аминь.


1. Текст написан киноварью

2. Так в тексте.

3. Так в тексте.


Житие XVI в. (1)

XVI в.

РГБ, Отдел рукописей, ф. 178, ед. 1365, 8`. Л. 1 – 13 об.

Л.1. Месяца июля в 8 день. Житие и подвизи о тчасти и о чюдесех святого великаго праведного Прокофя иуродиваго Христа ради, Устюжскаго чюдотворца. Господи, благослови, отче.

Слава показавшему нам Богу преславна чюдеса мужа свята Прокофя. Весть бо славити славящаго и благословити благословящаго, его ж прослави Господь Бог своего угодника. Благодарим Бога за премногую его благодать, бывшую на нас, яко ж апостол рече:"Благодать Богу о неизреченном его даре". Паче ж ныне должни есмя благодарити Бога о всех всяческих дарований таковаго светилника. Глаголю же:

Л.1 об. Праведна Прокопия в земли наши рустей, во стране восточней в последняя времена и лета. Гроб его в нас и пред нами есть до сего дни, к нему ж всегда с верою притекающим велико бо утешение душам нашим от сего зело ползуемся. Поистине велико то есть нам от Бога дарование даровася. Дивлю ся о сем аз многогрешный, како толико лет минуло, чюдеса его не написаны, о сем убо зжалихся зело, како убо такова мужа свята и пречюдна, от нел еж преставися много лет минуло, а не дерзнул нико ж писати о нем ни далний, ни ближний мудри, ни болшая, ни меншия, убо яко не смеяху

Л.2. а болшия убо яко не произволяху. В дени убо лето аз окаянный дерзнух на сие, вздохнув к Богу и блаженнаго Прокофия призвав на помощ, начах подобную повесть о чюдесех святаго писати себе в тайне, а не хваляся ни пред кем, написах памети ради и ползы, имяху у себе повестницы церковныя за много лет приготованныи такова мужа чюдна списания свиткы. И в них же быша многия написаныи глави зныи о чюдесех святаго гроба его, ово убо в свитце, ово ж в тетратех не по ряду, но предная на зади, а задная на переди. Сицо ожидающу ми в таковая времена и лета

Л.2 об. и дни и жаждающю ми того, дабы некто, паче мене разумнее и мудрие и веле умнее, дабы писал, и аз поклонюся ему, и он мене поучит и вразумит. Но о сем разу пытах и услышах и уведах известно, яко никто ж никгде ж неписашеся о чюдесех его, и сие убо егда воспомяну или услышу, помышляю и размышляю, како преславная его чюдеса пребыша без написания во многа времена бых безделен, в размышление, недоумение погружаются, печалю и оскорбляюся, недоумением удивляюся и желанием побеждаюся и наиде ми некое жание

Л.3. коим образом начати писати, и обретох некия старца премудры, во ответех разумны суть, и вопроси, глаголя:"Аще достоин писати? Они ж реша:"Яко нелепо во отреченных вницати, но святых муж жития не оставляти и преписати памети ради, но от того полза и велико утешение души списателем и сказателем, паче ж и послушателем самовидцы и паметухи, аще преставятся, толику ползу в забытии положыти". Да убо от имени Господа нашего Исуса Христа:"Без мене не можте ничто ж творити. Ищате и обрящете, просите, приимете". Той бо есть

Л.3 об. благ и милосерд, даяи просящему богатых своих даров и вще премудрости; той бо есть милосердным наставник и смыслу давше, не милосердным наказатель, учаи человека разуму и дая неумеющим умети и молитву, молящемуся и премудрость и разум и всяко даяние на ползу просящим, незлобивым коварство и отроку юну чювства и смыслы. Иж сказание словес его просвещает и разум дает младенцем. Добро есть о Бозе начати и о Бозе кончати речение Божиим рабом беседовати, о Божьи угоднице повесть чинити и о чюдесех его писати. В тои ж день

Л.4. Повесть душеполезна святаго и праведнаго Прокофия, уродиваго Христа ради устюжскаго, новаго чюдотворца рускаго о страшном чюдеси и необычном его видении и о пророчестви их. И яко водрузитися мыслене в чювство слышащим и вострепещем, поминая сия, подщимся сохранити заповеди Господня, угождения жизни ко страсти, иж всего мира книги вместити не могут. Иж ся обретоша в та лета любящему труды паче инех, жития церковни и повестницы написающ, се ж все того ради вспоминаем

Л.4 об. и на среду принесохом, но иж мы хощим написати о преславном сем пророчествии и о неизреченном чюдеси, еж в нашале та содеяша во граде Устюге. Бы некий муж уродивый Христа ради именем Прокопей, живяще в паперти у церкви святыя Богородица, честнаго Ея Успения, пища ж и одежди никако ж о том печаашеся и от приносящих к нему никако ж приимаше, имяше бо в себе прозор Божия явления множеству людей, прихощу на праздник в соборную и апостольскую церковь честнаго Ея Успения. Святы иж седяше близ церкви тоя на камени ни против

Л.5. никого ж не воставаше, ни поклоняяся. Едино иж идущи некое и жене града того от младыя версты некоего человека именем Иона, глаголемаго Секерина. И егда узре блаженный реченную жену ко церкви идущу, скоро вста и прглагола, рече:"Добре пойди рожное имат быти". Владыка же наж поклонись святому со тщанием, вхождаше во церковь и дивляся пророчеству святого, исходящим из уст его. И по сем бысть пророчество святого. Бысть же в день недельный, по заутреннии, егда воздвизают честныя кресты и собрашася вси людие, блаженный иж муж

Л.5 об. возвести бывшее видение ему всем людем, глаголя:"Аще не покаетеся грехов своих и Господа Бога не умолите за беззаконние ваше, то зле погибнет град сей". Яко ж пророк рече, возвах, неслушасте и невнимасте, одебеле бо сердце люди сих, ушима тяжко слышаше и очи свой смежина. Видев же блаженный он муж непослушание люди тех, рыдая и плачася непрестанно о погибели града того. И приходящии глаголюще нему:"Что плачеши непрестанно?"Он же глаголаше им:"Бдите и молитеся, да не вниде

Л.6. в напасть". Они ж яко немыслена его глаголюща. Бысть во другу неделю о полудни, бысть же тма и мрак, и недоумевахся, что се буди ысть. И по сем явися огнь со все страны, грому бо страшну бывшу не слышавшу ж, что друг со другом глаголюще. Яко земли колебатися, пламень же разливашеся непрестанно, огненныя же тучи хотяше соступитися вместо, и бывшу зною велику от огня того. И разумеша людие потребление града, свою погибель. И собрашася вси людие во церковь: мужи и жены, богати и убози, свободни и работнии, даже и до

Л.6 об. уноте; и покрыша лица землю и очи свои возведши горе, руце свои на высоту и со слезами вопяху, глаголюше:"Помилуй нас, Боже, по велицей милости твоей, помяни, нас, смиренных осуженных раб твоих, и приими нас, припадающих к тебе, привержении есми из утробы, от чрева матере моея, Бог наш ты еси, но зане исчезоша в суете дние наши, обнажихомся от твоея помощи, но, надеющися, твоим щедротам зовем:"Призри, Господи, от высоты святыя твоея на люд твоя предстоящая, чающих от тебе богатую милость. Помя

Л.7. ни, Господи, немощ нашу, не погуби нас беззаконии нашими, но сотвори великую милость смирением нашим, да тмы греховныя убежавше во дни правды ходим, облокешеся во оружие света, и с дерзновеним прославим о всех тебе единаго истиннаго Бога, человеколюбца". Пред иконою святыя Богородица припадающе со слезами, вопияху:"О пресвятая госпоже Дево владычице Богородице и владычице, выши, Госпоже, аггел и архангил и всея твари честнеиши! Милостию си, Госпоже, спаси Твоею град сий от труса находящаго, огня и напрасныя смерти, от всякаго зла. Отврати, Госпоже, всяк гнев,

Л.7 об. подвизающе на ны праведне, посети, Госпоже, милостию своею. Мир и здравие подай ж нам благоволением и благодатию единороднаго Сына и Бога твоего, нашего Иисуса Христа". И бы же той час яви чюдо преславно от иконы Пречистыя Богородица, честнаго Ея Благовещения. Людям же зрящим и молящимся образу Ея, ведящи ж искипящ источник мира изо образа Ея. И простреся источник той с высоты на землю, и многи люд полия предстоящыя ту. И вземше же сосуд, наполниша мира того, и в той же час бысть тишина велия, и ни грому бывшу, и развоше

Л.8. облацы огненыя на все страны, и поидоша на места пустая и попалиша дебрия на пустынях и камением побиша. От того ж мира знаменахуся: болнии здравии быша и хромым течение, а слепии прозираху, беснованныя от одержимых недуг здравии бываху; две жене беснованныя приведены быша и помазаху от мира того, и в том часе исцелени быша. И бысть радость велия, возвеселиша вси люде и воздаша хвалу, избави их от напрасныя смерти, яко от самую руку погибелную на свет

Л.8 об. изведе, то аще бы ны Господь остави нас, яко Содому и Гомору подобили быхом, показуя и наказа мя Господь, смерти не предаст. Воистинну, братие, праздник сей нам полон радости и веселия, же яви Господь чюдо свое на нас и излия милость свою обилно молитвою ради Пречистыя его Матере. И тамо во иерусалимскых странах тмами чюдесе показав Господь: израильтяне сквозе море проведе, ис камени им воду источи и в пустыне препитевый. И потом сниде Сын, слово Божие, на землю и в плоть одеявся и многа чюдеса показав: воду в вино претвори, слепыя просветив про

Л.9. светив, прокаженныя очистив, раслабленныя воздвигнув, духы лукавыя от человек отгнав. Да ж и до распятия, иж на кресте вознесеся и копием прободеся в ребра, ис пречистых ребр своих источив кровь и воду за избавление и спасение всего мира. Разумейте ж, братие, чюдеси сего силу, яж яви Господь милость свою на на, новом языце. Грех ради всего мира сам Господь наш Исус Христос на крест взыде и смерть прият, ис пречистыя своея плоти источивый кровь и воду на спасение всего мира нас ради, грех ради наших. Послав гнев свой на нас, казнити ны хотя за грехи наша, яко же пророк рече:

Л.9 об."Возвратятся грешницы во ад, вси языцы, забывающеи Бога". Молением Пречистыя Богородица, матери своей, гнев свой преврати на милость: произведе нам от суха древа источник мира на спасение наше. Разумеите, братие, Божие человеколюбие и щедроты его, яко праведен еси Господь во всех путех твоих, преподобен во всех делех своих, яко правдою и судом истинным навел еси на ны грех ради наших. Созда убо человека, персть от земля взем и образом почте и положи его в рай, пища безсмертныя жизни, восприятие вечных благ. Но преслушавше тебе,

Л.10. истиннаго Бога, создавшаго его, прелестися змеиною прелстившеся, умрешвен же бысть свой грехом: изгнал еси его праведным судом Боже от рая в мир сей и возвратил еси в землю, от нея ж взят бысть. И видя его во тлении суща, но милосердный Бог и премилостивый, ни бо отврати создания своего в конец, ниже дабы дело рук своих, и посла единочадаго сына своего Господа нашего Исуса Христа в мир сей грех ради наших единаго Адама, да сам ся вдаст на смерть и сшед во ад крестом и дасть собою измену смерти в не их держыми быхом и предани по грехом и осудих грех в теле своем.

Л.10 об. Разумеите ж, братие, како Бог ненавидит греха в нем же держыми бехом и предани под грехом, единаго ради греха не пощаде сына своего возлюбленнаго, господа нашего Иисуса Христа, и на смерть вдав. Мы же, братие, многими народы тмами согрешаем, грехи ко грехам прилагающе, то нас ли не казнит, яко ж пророк рече:"Единою месть отдам, — глаголет Господь. — То Бог милует, а мы раздражием его". Не уподобимся ниневгитяном, иже преж согрешивша к Богу. Посла Бог к ним пророка провзвестиша о погибели града за грехи их. Они ж преж послушавше пророка, прияша пост

Л.11. и молитву, и гнев Божий укротиша и спасени быша. И потом учаша ж быти в волях своих и глаголющи:"Аще ли бы сей пророк от Бога был, то явил бы Господь казнь свою на нас". И начаша первая своя дела творити. И посла Бог иного пророка, и прорече Ниневгию, яко Ниневгей град погибнути имат водою сланою и огнем. Они ж того не послушавше, и бысть повеление за грехи их: бяше бо ту езеро, нарицаемое Ниневея, трусу ж бывшу и погрузися град, и огнь пришед от пустыня, оставшую часть пожже по пророчеству святаго. Тем же и мы, братия, добре убо благодарствуем Бога,

Л.11 об. иж ны наказая зде, яко ж святый Дух глаголет усты Давидовыми днесь, аще глаголя:"Его слышите не ожестите сердец ваших, яко во прогневании в день искушения отцы ваши". Разумейте ж, яко не о том дни глаголеть Давид, иж казнь отцы ваши за грехи их, но о наш дни глаголет. Мы ж, братие, убоимся того, егда когда прогневается Господь за грехи наша. Тем же, возлюблении, подщимся гнев Божий укроти покаянием и слезами и милостнею, и заповеди его присно соблюсти любовию друг друга чтаще, яко ж сам написав и предав нам в законе, рекий:"Не убий, не укради,

Л.12. не прелюбы сотвори, ни лжив послух не буди, чти отца и матерь и возлюби ближняго яко сам ся, а не их есть по роду ближний, но всякаго в вере Христове, алчнаго напитающа, Божия рабы честно творяще, ти бо бдят о душах ваших, к церкви тщашеся день и нощь, ту очищаемся от греха, трезвящеся отнюд, с чистою совестию приступим к телу Божию и крове, не имуще вражды ни на кого ж, не лицем ся любяще, но сердцем почтаящи друг друга, тацеми жертвами угажати Богу. И гнев Божий укротим молением Пречистыя Божия Матере, паче ж

Л.12 об. надеянием и заступление наше, но надеющеся Владычице на милосердие Твое, еже к сыну рече:"Царю небесный, приими всякаго человека славящаго тя и призывающа имя твое и всяко место, иде ж памет бываеть имени твоею. И освяти место, и прослави прославляюще тя именем моим, приемля их всяку молитву и обет. Словом надеяся восхоте, да не без праздника останет святый сей день твоего чюдеси и нашего избавления и спасения от напрасныя смерти, но яко ж хощеши си украсити честный празник твой,

Л.13. да прославляющи тя возвеселятся, и видящи бо многоименныи празник сияющи, тако ж и се прослави, яко ж тогда сущи на нас милость свою излия и милостивно покрыи нас кровом крылу твоею. Мир и здравие даи ж нам, спаси ны по множеству сына твоего, и вся приходящая к тебе со страхом и веру надеющихся на тя, скорое заступление и помощ. Уставиша ж даковый праздникпраздновати мца июля в 8 день.

О создании церкви святого Прокофя на месте ж, ю на камени сидел. По неколицех летех по преставлении святого Прокофья блаженнаго христоимянитии

Л.13 об. граждане пресловущаго града Устюга мановением и проразсуждением древних онех муж, поставиша церковь во имя святого праведнаго Прокофя. Основана бысть на камени, на нем же святый при животе седя и пророчестоваше, паки соврешиша церковь тогда и гробницу устроиша и образ святого на гробе подобия его написаша и драгими паволоками гроб святого покрыша.

Житие XVI в.(2)

XVI в.

РГБ, Отдел рукописей, ф. 256, ед. 361.

Л.115. Месяца июля в 8 день…. В тои же день повесть душеполезна святаго праведнаго Прокопия, уродиваго Устюжьскаго чюдотворца о страшном чюдеси и необычном видении. И яко водрузитися мыслене в чювство, слышащим убоимся и вострепещем, поминающие сия. Подщимся сохранити заповеди Господня, и угождения жизни, страсти, иж всего мира книгы вместити не могуть. Иже ся обретошася в ты годы любяще труды и паче ины на славу Богу и на память родом инем жития церкови повестницы написающе, се же всего того деля воспоминаем и на среду принесохом, но мы хощем написати о преславном сем чюдеси, еже в нашале та содеяшася. Во граде Устюзе бысть некий муж уродивый Христа ради именем Еутропий и живяше в паперти у церкви святыя Богородица, честнаго Ея Успения, пища же и одежа никако же о том печашеся и от приносящих ему никако же приимаше, имяше бо в себе прозор Божия явления.

Л.115 об. Бысть же на утрие в день недельный по заутрени, егда воздвизают честныя кресты и собрашася вси людие, блаженныи же муж возвести видение, бывшее ему, людем:"Аще не покаетеся грехов своих и Господа Бога не умолите за безакония ваша, то зле погибнет град сий". Они же того непослушаша глаголемых от него, яко же пророк рече:"Звах, не послушасте и не внимасте, одебеле бо сердце людей сих, ушима тяжко слышаше очи свои смежиша. Видев же блаженный он муж непослушание людеи тех, рыдая и плачася непрестанно о погибели града того. И приходящии глаголаше ему:"Что плачешися непрестанно?"Он же глаголяше им:"Бдите и молитеся, да не вниде в напасть". Они же слышавше несмыслена его глаголющи. Бысть же во другую неделю о полудни бысть же тма и мрак, и неумехуся людие, что се есть. И по сем явися восходящии огнь со все страны, грому убо страшну бывшу, не слышавше же друг ко другу, что глаголяши. Яко земли

Л.116. колебатися непрестанно, огненыя же тучи хотя ступитися вместо, и бывшу же зною велику от огня того. И разумеша людие потребление града и свою погибель, и собрашася в церковь вси людие, мужие и жены, богатии и убозии, раби, и свободни, да иже до унот, и прикрыша лице землю и очи свои возведши горе, руце свои воздев на высоту, со слезами вопяху, глаголюше:"Помилуй мя, Боже, по велицей милости твоей. Помяни нас, смиреных и осуженных раб твоих. Приими нас, припадающих к тебе, привержены есмы изо утробы, от чрева матереи наших. Бог наш ты еси, но зане исчезоша в суете дние наше, обнажихомся от твоея помощи, но, надеющихся, твоим щедротам зовем:"Призри, Господи, от высоты святыя твоея на люди твоя предстоящия, чающих от тебе богатую милость. Помяни, Господи, немощ нашу, не погуби нас со безаконии нашими, но сотвори велию милость твою смирением нашим, да тмы греховныя убежавше, во дне правды ходят,

Л.116 об. оболокшеся во оружие света, и со дерзновением прославим от всех тебе единаго истиннаго человеколюбца Бога, пред иконою святыя Богородица, приподающе со слезами, умилно вопияху:"О пресвятая госпоже Дево Богородице Владычице! Вышеши бо еси Госпоже аггел и архаггел и всея твари честнеиши. Милостию своею, Госпоже, спаси и помилуй. Избави, Госпоже, град сий от труса находящаго и огня, и напрасныя смерти, и от всякого зла. И отврати, Госпоже, всяк гнев, подвизающиися на ны праведне, и посети ны, Госпоже, милостию своею мир и здравие подаждь нам благоволением и благодатию единороднаго сына твоего и Бога нашего Исуса Христа".

И бысть же в той час, явися чюдо преславно от иконы святыя Богородица, честнаго Ея Благовещения. Людем же зрящим и молящимся образу Ея, видящи же кипяще источник мира из ея образа. И простреся источник той мира с выше на землю и многи люди полия, предстоящая ту. И вземше же сосуди, наполниша миру того.

Л.117. В тои же час бысть тишина велия, ни грому небывшу, и разводящеся облацы огненыя на все страны и поидоша на места пустынная и попалиша брепие на пустынях и камением биша. От того же мира знаменахуся: болнии здрави бываху, хромым хождение сотворися, а слепии прозираху, беснованная от одержимых недуг здрави бываху. Две жены беснованныя приведени быша и помазани от мира того, и в том часе исцелени быша. Бысть же радость велия, возвеселишася людие и воздаша хвалу Богу, иже избави их Господь от напрасныя смерти, яко от самою рукою погибелною изят и на свет изведе, то аще не бы ны Господь оставил нас, яко Содому и Гомору уподобилися быхом, казая и наказа ны Господь, а смерти не предаст ны. Во истинну, братие, праздник сий нам полн радости и веселия, еже яви де Господь чюдо свое на нас и излия милость свою обилно молитвою Пречистыя его Матери. Иже тамо, во иерусалимских странах, тмами чюдес показа Господь: израильтяны скво

Л.117 об. зе море проведе и ис камени им воду источи в пустыне препитавый. И потом сниде Сын, слово Божие, на землю и во плот одеявся и многи чюдеса показав: воду в вино преложив, слепыя просвети, раслабленыя воздвигнув, духи лукавыя от человек отгна, та же и до распятия, иже на крест вознесеся и копием прободеся в ребра. Ис пречистых ребр своих источивый кровь и воду за исбавление и спасение всего мира. Разумейте же, братие, чюдеси сего силу, еже яви Господь милость свою на нас, и на новом языце. Грех ради всего мира сам Господь наш Исус Христос на крест взыде и смерть прият, ис пречистыя своея плоти источивый кровь и воду на спасение всего мира нас ради и грех ради наших. Посла Господь гнев свой на нас и казнити ны хотя за грехи наша, яко же пророк рече:"Возвратятся грешницы во ад и вси языцы, забывающеи Бога". Молением Пречистыя Девы Богородица и пречистыя его матери, гнев Божий пре

Л.118. враты в щедроты, казнь, на нь хотящую быти, преврати на милость: произведе нам от суха древа источник мира на спасение наше. Разумейте же, братие, Божие человеколюбие и щедроты его, яко праведен еси Господи во всех делех своих, яко правдою и судом истинным навел еси на ны грех ради наших. Создав убо человека, престь от земля взем и образом своим Боже почет, положи его в рай, пища бесмертныя жизни, и восприятие вечных благ. Но преслушавши тебе, истиннаго Бога, создавшаго его, прелестию змииною прелстившеся, умрещвен же бысть своим грехом: изгнал еси его праведным судом Боже от рая в мир сей и отвратил еси в землю, взят бысть. И виде его во тление суща, но милосердыи Бог и премилостивый бо, не бо отвратися создания своего вконец, ни же забы дело рук своих, посла единочадаго Сына своего Господа нашего Исуса Христа в мир сей грех ради, единого ради человека Адама

/Далее — во ад с крестом, Ниневия и вообще как 178 — 9107, 92 -48/

НО потом:

Л.121. Месяца июля в 8 день. Житие и подвизи отчасти чюдесех святого великого Прокопия праведного уродиваго Христа ради, Устюжьскаго чюдотворца. Благослови, отче.

Слава показавшему нам Господу преславная чюдеса мужа свята Прокопия. Весть бо Господь славити славящаго и благословити благословящаго, его ж прослави Господь Бог своего угодника. Благодарим за премногую его благодать, бывшую на нас, яко ж апостол рече:"Благодать Богу о неизреченнем его даре". Паче ж ныне должни есмы благодарити Бога о всех всяческих дарований таковаго светилника. Глаголю же: Праведнаго Прокопия в земли нашеи рустей, во стране восточней во дни последняя времена и лета. Гроб его в нас и пред нами есть и до сего дни, к нему же и мы всегда с верою притекающе, велико бо утешение душам нашим от всего зело ползуемся. Поистине велик той есть нам от Бога дарование даровася. Дивлю же ся о сем аз многогрешный, како толико лет минуло, чюдеса его не написаны, о сем убо зжалихся зело,

Л.121 об. како бо такова мужа свята и пречюдна, отнележе преставися много лет минуло, а не дерзнул ни кто же писати о нем — ни далний, ни ближний, мудрии, ни болшая, ни меншая, убо яко не смеяху; а болшия, убо яко не произволяют во едино убо. Аз, окаяннии и многогрешный, дерзнух на сиа, вздохнув к Богу и блаженнаго Прокофья призвах на помощ и начах подобную повесть о чюдесех святаго писати себе в тайне, а не хваляся ни пред кем. Написах памети ради и ползы, имея же у себе повестницы церковныя за много лет приуготованныи таковаго мужа чюдна в списатия в свитцех. В них же быша многая написаны главизны о чюдесех святаго гроба его, ово убо в свитце, ово же в тетратях не поряду, но предная на зади, а задная на преди. Сице ожидающу ми таковая времена и лета и дни, и жаждающу ми того, дабы некто паче мене разумнее и мудрее и велеумнее, егда бы писал, и аз поклонюся ему, и он мене поучит и вразумит. Но о сем распытах и услы

Л.122. шах и уведах известно, яко никто же ни где же не написаше о чюдесех его, и сие убо егда воспомяну или услышу, помышляю и размышляю, како преславная его чюдеса пребыша бес писания во многа времена бых бездел, в рашлении, недоумением погружаюся, печалию и оскорбляюся умом, недоумением удивляюся и желанием побеждаюся и наидеми желание, коим образом начаша писати, и обретох некия старца премудры, во ответех разумны суть, и вопроси, глаголя:"Аще достоино писати?"Они ж реша:"Яко лепо во отреченных приницати, но святых муж жития не оставляти и преписати памети ради, но от того полза велика, утешение души списателем и сказателем, паче же послушателем, самовидцы и памятухи, аще преставятся, толику ползу в забытии положыти". Да убо по имени Господа нашего Исуса Христа:"Без мене не можете ничто же творити. Ищете, обрящется вам, просите и приимете". Той бо есть благ и милосерд и дая просящему богатых

Л.122 об. даров своих и вещь премудрости; той бо есть мудрость наставник и смыслу давец, не мудрым наказатель, уча человеку разуму и дая неимеющим умети, молитву молящемуся и премудрость и разум и всяко дая на ползу просящим, незлобивым коварьство и отроку уну чювство и смысл. Иж сказание словес его просвещает и разум дает младенцем. Добро есть о Бозе начати речение Божиим рабом беседовати, о Божии угодницы повесть чинити и о чюдесех его писати.

/Далее — почти точно 178 — 1365 до"О создании ц–ви стого Пр. На месте Юстюзе на камене седел…"включительно/

Чудеса — см. соответствующую таблицу.

Л. 134 — Похвала Прокопию.

Житие XVI в.(3)

Российская государственная библиотека, Отдел рукописей, ф. 256 (собрание Н. П. Румянцева), № 397. Службы российским святым и праздникам, установленным в России, а также некоторым сербским и болгарским, по порядку месяцеслова, с присовокуплением житий и похвальных слов. Полуустав в два столбца 16 в. В лист. Л. 429–430 об. Житие Прокопия Устюжского.



Л.429. Месяца июля в 8 день знамение пречистыя владычица нашея Богородица и присно девы Мария, бывшее от честнаго Ея образа в граде Устюзе, и святаго преподобнаго Прокофя, Христа ради уродиваго Устюжскаго, новаго чюдотворца. И благослави, отче.

Сему убо святому Прокофию еще живу сущю живущю ему в паперти церковном пресвятыя Богородица честнаго Ея Успения. В день убо святый похабство творяше по граду, а в ноще мало сна приимаше святый, моляше Бога и пречистую Богородицю за правослваного князя и за все христолюбивое воиньство и за град и люди, еже

Л.429 об. бы им в Христове вере неподвижном быти и всем спастися и в разум истины приити, и о одолении враг, еже послати Господу Богу нашему одоление на иноплеменный язык безсерьменский и латыньский, избавитися им от глада и мора, труса и потопа и межиособныа рати. И поживе блаженный время доволно в том жестоком житии и трудех, и уведев блаженный свое отхождение к Богу и нача пророчествовати и глаголати людем с плачем, глаголя:"Бдите и молитеся, да не внидите в напасть, оставите нечистоту и злобу и лукавство от душ ваших отрините, того бо ради на вы грядет гнев господень". Народи же не вняша словесем святаго, не послушаша его, мняще блаженаго урода и похаба суща. И по сем мало пожив святый святый и в добре исповедании преставися к Богу в вечныя обители. И положены быша честныа его святыя и многотрудны ж мощи в том же граде Устюзе. И абие по мале времени по предствалении блаженнаго Прокофия збысться пророчество святого на людех. И се внезапу приидоша две тучи на град огнени и страшни зело, яко раскалающуся огню тому

Л.430. и разливающюся пламени на многи части, и быша молниа и громове страшни, яко колебатися месту тому. И паки священноначалницы церковнии и весь народ, мужи и жены с младенци собрашася в церковь пресвятыя Богородицйа честнаго Ея Успения и покрыша лицы своими землю и мочаху слезами, молящеся Господу Богу и пречистей Богородицы о избавлении града и о своей кончине, еже согрешили к Господу Богу. И абие умилосердися милостивый Господь Бог наш, услыша молениа и слезы и стонание людеи своих, утоли праведный гнев свой. И отидоша тучи огнены с града на пустыня и пожже и поби каменцем пустыня и дебри. И паки в тои час бысть чюдо преславно от честнаго образа Благовещения пресвятыя владычица нашея Богородица: изыде миро даждь, и до земли простреся источник мира того. Священницы ж наполниша сосуди мира оного святого, и мнози болящии и недужнии и беснии помазани быша в той час от мира того святого и исцеление прияша неисцелным своим страстем. И абие оттоле начаша празновати празник пресвятыя владычица нашея Богородица и присно Девы Мария,

Л.430 об. честнаго Ея знамения. И паки к честному и целебоносному гробу святаго Прокофья многими и различными недуги человецы одержими и бесновании с верою приходяще приемлют многа исцеления даже и до дне молитвами святаго Прокофия. Богу нашему слава с отцем и святым Духом, ныне и присно и во веки веков.




Оглавление

  • Житие 1660–е гг.
  • Житие 1660–е гг. Вторая редакция.
  • Житие XVI в. (1)
  • Житие XVI в.(2)
  • Житие XVI в.(3)